Muqdisho (SONNA), Ra’iisul Wasaaraha xukuumadda Federaalka Soomaaliya Mudane Xasan Cali Khayre, ayaa Dawladda Jabuuti uga mahaceliyay sida ay mar waliba u garab taagantahay dawladda iyo dadka Soomaaliyeed.
“Dawladda Jabuuti ee walaalaheen ah oo noo tababartay ciidanka waxa aan uga mahadcelinayaa dadaalka walaalnimo ee ay mar walba nala garab taaganyihiin. Dhamaan dhalinyarada lasoo tababaray waxa aan leeyahay Hambalyo, kusoo dhawaada dalkiinna, Waxaa idin sugeysa shaqo aad u culus oo ah tan ugu wanaagsan oo qof u qabto dalkiisa taas oo ah difaaca dalkaada hooyo. Waxa aan rajeynayaa in aad uga faa’iideyn doontaan waxa la idin soo baray shacabka Soomaaliyeed iyo dalkiinna”, ayuu yiri Ra’iisul Wasaare Khayre.
hadalkaan ayuu R/wasaare kheyre ku sheegay Khudbad xalay uu u jeediyey Ciidamo dhowaan tababar kusoo qaaday dalka Jabuuti oo ku sugnaa xarunta gaadiidka Ciidanka Booliska Soomaaliyeed.
Dawladda Soomaaliya oo xoogga saareysa sidii amniga iyo kala danbeynta dalka loo adkeyn lahaa, amniga guud ee dalkana loogala wareegi lahaa Ciidanka AMISOM ayaa horumarin iyo tababarro joogta ah ku heysa dhamaan ciidamada qalabka sida ee dalka.
