Ra’iisul Wasaaraha Xukuumadda Federaalka Soomaaliya (XFS), mudane Xasan Cali Khayre, ayaa guddoomiyay shir amniga looga hadlayay oo lagu qabtay magaalada Cadaado.
Shirka ayaa looga hadlay Qorshaha guud ee Amniga dalka, dardar-gelinta Qorshaha xoreynta deegaannada ay argagaxisadu kaga sugantahay deegaannada Galmdug oo qayb ka ah qorshaha guud ee xoraynta dalka iyo diyaarinta ciidamo Booliis ah oo la wareega amniga deegaannada ciidanka xoogga dalku ay xoreeyaan.
Ra’iisul Wasaaraha oo warbixin ka dhagaystay saraakiisha Amniga ee heer federaal iyo heer dowlad gobaleed, ayaa faray laamaha amniga ee dowladda Federaalka in si dhaw ay ula shaqeeyaan hay’adaha ammaanka ee dowlad gobaleedka Galmudug si guul looga gaaro qorshaha amniga.
Shirka ayaa waxaa ka qayb galay Wasiirrada Amniga Gudaha, iyo Arrimaha Gudaha, Wasiirru dowlayaasha arrimaha guddiha iyo howlaha guud, Xildhibaanno, Madaxwaynaha dowlad gobaleedka Galmudug iyo saraakiil amni oo ka socota dowladda Federaalka iyo dowlad gobaleedka Galmudug.
