Ra’iisul Wasaaraha xukuumadda federaalka Soomaaliya (XFS), mudane Xasan Cali Khayre, ayaa maanta xafiiskiisa ku qaabilay Taliyaha howl-galka Atlanta ee midawga Yurub ee la dagaallanka Burcad-badeedda, Antonio Martorell, oo uu wehliyo safiirka midawga Yurub ee Soomaaliya, Nicolas Berlanga MARTINEZ.
Ra’iisul Wasaaraha ayaa caddeeyay in dowladda Soomaaliya ay ka go’antahay in xeebaha dalka iyo marinnada gaadiidka Badda laga cirib tiro burcadda badaha ee dhibaatada amni iyo dhaqaale ku haya gobalka iyo guud ahaan caalamka.
Antonio Martorell oo Ra’iisul Wasaare Xasan Cali Khayre uga mahad celiyay qaabilaadda, ayaa dowladda Soomaaliya ku ammaanay dadaallada la dagaalanka falalka burcad-badeednimada iyo afduubka salka ku haya.
Taliyaha howl-galka Atlanta ee midawga Yurub ee la dagaallanka Burcad-badeedda ayaa ballan qaaday in ay dardar-gelinayaan dadaallada lagu wiiqayo burcad-badeednimada, si meesha looga saaro dhibaatada burcadda baddu ku heyso ganacsiga caalamiga ah, amniga badaha iyo dhaqaalaha.
‘
