Ra’iisul Wasaare Ku-Xigeenka Xukuumadda Federaalka Soomaaliya ahna Xildhibaan katirsan Golaha Shacabka Mudane Maxamed Cumar Carteh ayaa u hambalyeeyay Madaxweyanaha cusub ee Jamhuuriyadda Federaalka Soomaaliya Mudane Maxamed Cabdullaahi Farmaajo.
Mudane Carteh ayaa Madaxweynaha cusub Alle uga baryay in uu u fududeeyo masuuliyadda weyn ee loo doortay.
“Maanta waxa ay ahayd maalin ay guul u soo hooyatay shacbiga Soomaaliyeed, guud ahaan, gaar ahaanna xubnaha Baarlamaanka Soomaaliya oo ka jawaabay rabitaankii shacbiga markii ay doorteen Madaxweynaha cusub. Waxa aan Illaahay ka baryayaa in uu ku guuleeyo waajibaadka Qaran ee ku saaran”.
Dhanka kale, Ra’iisul Wasaare Ku-Xigeenka ayaa dadka Soomaaliyeed ka codsaday in ay si niyad sami ah u la shaqeeyaan Madaxweynaha la doortay.
“Dhamaan dadka Soomaaliyeed waxa aan ka codsanayaa in si qalbi furnaan ah u la shaqeeyaan Madaxweyne Farmaajo si aan u adkayno midnimadeena iyo dawladnimadeen si ay inoogu horseeddo nabad iyo horumar”.
Ugu dambeyn, Mudane Maxamed Cumar Carteh ayaa Madaxweyne Maxamed Cabdulaahi Farmaajo kula dardaarmay in uu mar walba ku shaqeeyo rabitaanka dadka Soomaaliyeed.
—–DHAMAAD—–
