Ra’iisul Wasaare ku Xigeenka dalka Itoobiya ayaa la kulmay Ergeyga gaarka ah ee Maraykanka si ay u dardargeliyaan wadahadalada xabbad-joojinta, iyadoo Dowladda Ethiopia ay ogolaatay in 369 baabuur oo gargaar ah ay galaan gobolka Tigray ee ay abaaruhu ku dhufteen.
Jeffrey Feltman iyo Olusegun Obasanjo oo ah wakiilka Midowga Afrika ee Geeska Afrika ayaa shalay gaaray Dalka Ethiopia waxaana labada ergey ay doonayaan in xukuumadda iyo ciidamada kacdoonka wada ee Tigreega iyo xulafadooda ay ku dhawaaqaan xabbad- joojin shuruud la’aan ah, si gargaar loo gaarsiiyo dadka degan deegaannada Waqooyiga Itoobiya ee ay dagaaladu saameeyeen.
Ciidamada Tigreega ayaa sheegay in ay maamulaan Lalibela iyo Kombolcha oo ka tirsan dhulka Axmaarada, sidoo kale waxay u dhaqaaqeen qaybo ka mid ah gobolka Canfarta.
Ku dhawaad 400,000 oo qof ayaa la rumeysan yahay inay ku nool yihiin xaalad macaluul ah gobolka Tigray, halkaas oo Qaramada Midoobay ay maalinnimadii shalay aheed sheegtay inay awoodi waysay inay cunto geyso muddo bil ah.
Qoraalka ayaa lagu sheegay in inta badan hooyooyinka uurka leh iyo kuwa nuujinaya ee halkaas ku sugan ay hayso nafaqo-darro ba’an.
Dowladda Ethiopia ayaa beenisay eedeymaha uga yimid saraakiisha Qaramada Midoobay ee ah in ay wado go’doomin dhab ah.
Hogaamiyayaasha xisbiga Tigray People’s Liberation Front (TPLF) ayaa doonaya in ra’iisul wasaare Abiy Ahmed uu xilka ka dago, gargaar bini’aadantina uu galo Tigrayga. Dawladdu waxay doonaysaa in ciidamada Tigreega ay ka baxaan dhulka ay ka qabsadeen gobollada deriska la ah.
