Muqdisho, 18 June, 2016: Ra’iisul Wasaare Ku-Xigeenka Jamhuriyadda Federaalka Soomaaliya Mudane Maxamed Cumar Carteh ayaa waxa uu Brusseles kula kulmay Mudane Neven Mimica, Guddoomiyaha Iskaashiga Caalamiga ee Midowga Yurub. Kulankan oo diirada lagu saarayay sidii kor loogu qaadi lahaa tayada hay’adaha dowladda iyo adeega bulshada.
Mudane Neven Mimica ayaa waxa uu ku dhawaaqay in Midowga Yurub ay Soomaaliya u balanqaaday €73 million. Lagactan oo loo qoondeeyay in kor loogu qaado tayada hay’adadaha dawladda, shaqo loo abuuro dhallinyarada iyo bulshada ay abaaraha iyo cimilooyinka saameeyeen.
Ra’iisul Wasaare Ku-Xigeenka, Mudane Maxamed Cumar Carteh ayaa aad u soo dhaweeyay deeqdan loogu talagalay Soomaaliya, ugana mahad celiyay sida Midowga Yurub ay u garab taagnaayeen Soomaaliya ilaa iyo markii xornimada ay Soomaaliya qaadatay.
Waxa kale oo uu Ra’iisul Wasaaraha ka codsaday Midowga Yurub in ay dhiira-geliyaan ganacsatada wadamada Yurub si ay u maalgashadaan Soomaaliya. Mudane Maxamed Cumar Carteh ayaa aad u muujiyay in deeq oo keliya Soomaliya horumar ku gaari karin, balse loo baahan yahay in kor loo qaado ganacsiga lana dhiso ilaha dhaqaalaha ee Soomaaliya.
