Ra’iisul Wasaaraha Xukuumadda Federaalka Soomaaliya Mudane Maxamed Xuseen Rooble oo xuska aas-aaska Ciidanka Xoogga Dalka Soomaaliyeed kula qaatay Ciidanka Milatariga ee jiidda Awdheegle ee Gobolka Shabeellaha Hoose ayaa bogaadiyey guulaha isdaba jogga ah ee dhiiranaanta leh oo Ciidamada Qalabka Sida ay ka soo hooyeen dagaalka ka dhanka argagixisada Alshabaab iyo difaaca dalka oo ay u hurayaan dhiiggooda.
Ra’iisul Wasaaraha ayaa hambalyo iyo bogaadin uga soo jeediyo dhammaan Ciidanka xoogga dalka, oo ay ugu horreeyaan saraakiisha, srakiil-xigeennada, alifleyda, dableyda, xaasakooda, carruurtoodaba iyo dhammaan qaybaha kala duwan ee ciidamada.
“Guulaha aad ka soo hooyneysaan furimaha dagaalka ee naf-hurnimada leh iyo sida aad u wiiqdeen tabartii argagixisada waxa ay ifaaflo wanaagsan ka bixinaysaa muuqaalka iyo qorshaha dib u dhiska Ciidanka Xoogga Dalka oo si dardar leh u socda.”
Ra’iisul Wasaaraha ayaa kormeeray qeybaha kala duwan ee Taliska Xarunta Awodheegle, isagoo dul istaagay xaaladaha nololeed ee Ciidanka, kana dhageystay warbixinno Saraakiisha hormuudka ah oo la wadaagay Ra’iisul Wasaaraha sida ay uga go’an tahay in ay dalka ka xoreeyaan argagixisada Alshabaab.
Ra’iisul Wasaare Maxamed Xuseen Rooble oo kormeerkan ay ku weheliyeen Wasiirka Gaashaandhigga XFS Mudane Xasan Xuseen Xaaji, Wasiirka Caafimaadka Marwo Fowsiya Abiikar Nuur iyo Taliyaha Ciidanka Xoogga dalka Sarreeye Gaas Odowaa Yuusuf Raage ayaa Alle naxariistiisa Janno u weydiiyey dhammaan halyeeyadii Ciidanka Xoogga Dalka ee u shahiiday difaaca dalka iyo in ay nabad ku seexdaan shacabka Soomaaliyeed, Waxaanna adkeeyey in Xukuumadda ay mudnaan buuxda siineyso qoysaska iyo ubadka ay ka tageen, halka la xoojinayo daryeelka iyo goobaha caafimaad ee halyeeyada u waxyeelooba difaaca dalka.
