Ra’iisul Wasaare Ku-Xigeenka Xukuumadda Federaalka Soomaaliya Mudane Maxamed Cumar Carteh ayaa la kulmay Wafdi ka socday Jaamacadda Carabta oo ay kamid ahaayeen Madaxa Jaamacadda Carabta u qaabilsan Geeska Afrika Mudane Zayd Al-Saban, Madaxa kormeerka doorashooyinka Jaamacadda Carabta Mudane Ahmed Amiin Suldan, iyo Safiirka Jaamacadda Carabta ee Soomaaliya Mudane Maxamed Abdullah Idriis.
Mudane Carteh ayaa sheegay in wafdigan ay kawada hadleen doorashada Madaxweynaha ee dalka ka dhici doonta iyo xaaladda abaaraha dalka.
“Wafdigan waxa ay Soomaaliya u imaadeen in ay kor-joogto ka noqdaan doorashada arbacada ka dhaceysa Muqdisho ee lagu dooran doono Madaxweynaha Jamhuuriyadda, sidoo kale waxa ay u kuur-geli doonaan xaaladda abaaraha ee dalka ka jirta”.
Ugu dambeyn, Mudane Maxamed Cumar Carteh ayaa uga mahadnaqay wafdiga sida Jaamacadda Carabta ay u garabtaaganyihiin walaalahooda Soomaaliyeed.
—–DHAMAAD—–
