Safaaradda Soomaaliya ee Switzerland ayaa si rasmi ah u billaawday in Muwaadiniinta Soomaaliyeed ee ku nool Magaaladda Geneva ee dalkaasi ay siiso Baasaboorka Soomaaliga oo ka mid ah adeegyada ay baahida weyn u qabeen jaaliyadda ku dhaqan dalkasi, iyadoo muwaadiniinta ay soo dhaweeyeen helitaanka baasaboorka Soomaaliga.
Cabduqaadir Maxamed Xuseen Barqadle oo ah Xoghayaha 1-aad ee Safaaradda iyo Saalax Abuukar Madani la taliyaha Safaaradda Jamhuuriyadda Federaalka Soomaaliya ay ku leedahay dalka Switzerland ayaa sheegay in howlaha bixinta Baasaboorka ay sidii loogu talagalay ay usocdaan .
“10 bishaan Maarso ayaan billaawnay inaan bixinno adeegga Baasaboorka ,dadkuna waxa ay billaabeen in ay iskuwargeliyaan isuguna hambalyeeyaan helitaanka basaboork Soomaaliga, inagoo u diyaar ah inaan daboolno baahidda muwaadiniinta Soomaaliyeed ”. sidaas waxaa yiri Xoghaya Safaaradda Cabduqaadir Maxamed Xuseen Barqadle.
Xoghayaha oo hadalkiisa sii wata ayaa intaasi raciyay “Arrintaan waxaa ay ka dambeysay ka dib markii ay Hay’adda Socdaalka iyo Jinsiyaddaha Soomaaliya ay sheegtay in la ballaarinayo adeegyada Baasaboorka si loo gaarsiiyo dhammaan Soomaalida meel walbo oo ay dunida kaga suganyihiin”.
Soomaalida ku nool dalka ee Switzerland ayaa hore adeeggaan u aadi jireen waddamo uu ka mid yahay dalka Belgumka si ay u helaan Baasaboorka Soomaaliga, hase yeeshee wixii waqtigaan ka dambeeyo si fudud ayay uga heli karaan Xarunta Safaaradda Jamhuuriyadda Federaalka Soomaaliya ay ku leedahay Magaaladda Geneva ee dalka Switzerland.
