Magaalada Nairobi ee dalka Kenya ayaa lagu qabtay munaasabad heer caalami ah oo lagu guddoonsiiyay Senator Xasan Iidow Muxumed (Kobac) abaalmarinta qiimaha badan ee “Humanitarian Visionary Award” oo ay bixiso Baarlamaanka Madaxa Bannaan ee Dhallinyarada Afrika (Independent Pan-African Youth Parliament).
Abaalmarintan ayaa lagu maamuusay dadaalka iyo hoggaaminta uu Senator Kobac ku muteystay kor u qaadidda nolosha beni’aadamka, samafalka, iyo horumarinta bulshada Soomaaliyeed, taasoo tusaale wanaagsan u ah hoggaamiyaha dhallinyarada Afrika.
Waxaa abaalmarinta si rasmi ah u guddoonsiisay Marwo Najmo, oo ah Madaxweynaha Baarlamaanka Dhallinyarada Afrika, iyadoo la dhageystay hadallo dhiirrigelin iyo bogaadin isugu jira oo ay ka jeediyeen madax iyo marti sharaf kale.
Munaasabadda waxaa kasoo qeyb galay Safiirka Soomaaliya ee dalka Kenya Danjire Jabriil Ibraahim Cabdulle, Wasiirka Beeraha Xukuumadda Federaalka Soomaaliya Mudane Maxamed Cabdi Xayar Maareeye iyo mas’uuliyiin kale oo heer caalami ah, kuwaasi oo ka marag kacay kaalinta muuqata ee Senator Xasan Iidow Muxumed (Kobac) uu ku leeyahay dhanka samafalka iyo adeegga bulshada.
