Munaasabadaan oo ay ka qeyb galeen masuuliyiinta wasaaradda Beeraha Soomaaliya ayaa aheyd mid lagu soo dhaweynayey ilaa iyo 20-dhalinyaro ah oo kamid ah shaqaalaha wasaaradda Beeraha Soomaaliya, kuwaas oo tababaro kusoo qaatay wadanka Austria.
Tababarka ay soo qaateen shaqaalahaan katirsan Wasaaradda Beeraha Soomaaliya ayaa soconayey mudo laba bilood ah, waxaana lagu baranayey horumarinta Beeraha.
Wasiir ku xigeenka wasaaradda Beeraha Soomaaliya Mudane Xaamud Cali Xasan oo kahadlay Munaasabadda ayaa sheegay in shaqaalahaan ay ka filayaan wixii ay soo barteen in ay uga faaiideeyaan beeraleyda dalka.
“Runtii baahi weyn ayaan u qabnay in shaqaalaheenu ay helaan tababar nuucaan oo kale ah, sababtoo ah waxey taas qeyb ka qaadaneysaa inan hormarino wax soo saarkeena beeraha oo keenaya inan dalka dibadiisa u dhoofino wixii aan soo saarnay”ayuu yiri wasiir ku xigeenka Beeraha.
Wasaaradda Beeraha Soomaaliya ayaa ku howlan horumarinta beeraha dalka, iyada oo kaashaneysa Hay”ado caalami ah oo ka shaqeeya dhinaca Beeraha.
