Xafiiska diiwaan galinta qaran ee UK ayaa sheegay in laga soo billaabo bishii maarso ee sanadkaan kolkaas oo UK uu ka dilaacay cudurka Covid-19 ay shaqo waayeen 695,000(lix boqol sagaashan iyo shan kun) oo qof.
Heerka shaqo la,aantu wuxuu kordhay 4.1% taas oo aad u sameysay dhallinyarada gaar ahaan inta u dhaxeysa da’da 16 ilaa 24 jirka, wuxuuna gaaray heerkii ugu sareeyay marka loo eego saddexdii sano ee ugu danbeysay.
Waxaa muuqda in aanu dhaqaalaha soo kabaneyn walina ay jirto saameynta Covid-19.
Shaqooyinka ugu badan ee xirmay ayaa ah hoteelada,maqaayadaha iyo goobaha dalxiiska, taas oo ay sabab u tahay saameynta dhanka socdaalka ee karoonaha.
Shirkado badan ayaa dhimay shaqaalahooda halka kuwa kalana ay gabi ahaanba suuqa ka baxeen.
Mashruuca dowladu ku taageereysay ganacsiga iyo shirkadaha kaas oo 80% ay mushaarka bixineysay ayaa ku eg 31 bisha soo socota ee October.
Arrintan ayaa sababi doonta sida ay sheegayaan dadka dhaqaalahanka ah in shaqo la,aantu ay sii kordhi doonto.
Waxaa iminka Aad u kordhay dadka dalbanaya lacagaha ceyrta ee lagu kabo dadka aan shaqo heysan si ay ugu noolaadaan.
