Shir looga hadlay sameynta siyaasad qaran ee amniga, cuntada iyo nafaqeynta iyo xoojinta shirka billaha ah ee looga hadlo kor u qaadidda nafaqada (Scale up nutrition), ayaa maanta lagu qabtay xafiiska Ra’iisul Wasaaraha dalka.
La taliyaha arrimaha bulshada ee xafiiska Ra’iisul Wasaaraha Soomaaliya, ahna xariiriyaha tubta horumarinta arrimaha bulshada, Maxamed Cabi Xasan, ayaa guddoomiyay shirka oo ay kasoo qayb galeen agaasimayaasha guud ee wasaaradaha Kalluumeysiga iyo Xanaanada Xoolaha, howl wadeenno ka socday wasaaradaha Ganacsiga, Caafimaadka iyo Beeraha, jaamacadda ummadda iyo xafiiska Ra’iisul Wasaaraha.
Kulanka intiisa badan ayaa diiradda lagu saaray siyaasadaha iyo istaraatiijiyada siyaabaha kala duwan ay wasaaraduhu u sameysteen ee la xariira amniga cuntada iyo nafaqeynta iyo sida ay uga qayb qaadan karaan sameynta siyaasad mideysan oo dalku ka yeesho amniga cuntada iyo nafaqeynta khuseeya.
Siyaasadda qaran ee amniga cuntada iyo nafaqeynta ayaa qorshaheedu yahay sidii loo sameyn lahaa Istaraatiijiyo sare loogu qaadayo amniga cunnada, nafaqada iyo yareynta faqriga guud ahaan dalka, loona waaafaji lahaa qorshaha horumarinta qaranka, si ay qayb uga qaadato qorshaha Cafinta deymaha dalka lagu leeyahay.
Barnaamijka dardar-gelinta Cunnada caafimadka iyo korriimaha leh ee Soomaaliya (Scaling up Nutrition, SUN) oo kamid ah barnaamijyada hoos taga xafiiska Ra’iisul Wasaaraha ayaa soo agaaasimay kulanka oo dhammaan ka qayb galayaasha lagu war geliyay in ay firkadahooda iyo talooyinkooda ku daraan qorshaha diyaarinta siyaasada amniga cuntada iyo nafaqada.
