Shirkii ugu horeeyay ee cilmi baaris caafimaad oo ay soo qaban qaabiso Jaamacadda Jamhuuriya ee culuumta iyo Teknoloojiyada ayaa lagu qabtay magaalada Muqdisho.
Shirkan oo ay kasoo qeyb galeen xeel dheerayaal caafimaad oo ka kala yimid Dalka iyo Dibadda ayaa diirada lagu saaray baahida loo qabo sare u qaadista iyo tayeynta cilmi baarista caafimaad ee laga sameeyo Soomaaliya.
Dr. Axmed Baashi Cumar Cabdi ayaa ugu horeyn oo ka warbixiyay ujeeddada shirka ayaa xusay inay lagama maarmaantahay in la helo quburo arrinta gacan ku siisa ardayda.
Guddoomiyaha Jaamacada Jamhuuriya Injineer Maxamuud Axmed Jimcaaleoo ka hadlay munaasabada furitaanka shirka ayaa raja weyn ka muujiyay in guusha laga gaaray shirkan mid ka wanaagsan la gaari karo hadii la helo iskaashi dhex mara Jaamacadaha dalka.
Xamdi Jaamac Maxamed oo ku guuleysatay Abaal marinta cilmi baarista ugu wanaagsann ee lagu soo bandhigay shirka ayaa dhankeeda bogaadisay dadaalka uu Maamulka Jaamacadda Jamhuuriya galiyay agaasinka shirkan iyada oo hoosta ka xariiqday in ay guul u tahay guud ahaan Ummadda Soomaaliyeed qabsoomidda shir noocaan ah.
Prof. Cabdi Geelle oo ah cilmi baare ka tirsan Jaamacada Oslo ee dalka Norway ayaa tilmaamay in ay tahay guul weyn in Soomaaliya ay qeyb ka noqoto sameynta culuumta oo ay saldhig u tahay baaritaannada caafimaadka.
