Shirkaan wada tashiga ah ee looga hadlayay dar-galinta hananka dib u eegista dastuurka KMG ah ee dalka oo maanta ka furmay magalada Muqdisho ayaa waxaa ka qayb galay Ra’iisal wasaare ku-xigeenka XukumaddaSoomaaliya, Wasiirka dastuurka dowladda Federaalka, Wasiirada arrimaha dastuurka ee maamul goboleedyada , Koofur galbeed, Jubbaland, Galmudug iyo Puntland, Guddigiga kormeerka Baarlamaanka ee Arrimaha dastuurka iyo kan madaxa banaan ee dib u eegista iyo hirgelinta dastuurka KMG ah.
Shirka oo ay soo qaban qaabisay Wasaaradda Dastuurka ayaa waxa uu socon doonaa muddo labo cisho ah, iyadoo u jeedka shirka uu yahay sida maamul goboleedyada ay kaalin uga qaadan lahaayeen geedi socodka dib loogu eegayo dastuurka KMG ah ee dalka.
Wasiirka arrimaha dastuurka ee Xukumadda Soomaaliya Mudane Xuseen Maxamud Sheekh Xuseen oo ugu horayn ka hadlay furitaanka shirka ayaa tilmaamay in shirkan uu ahmiyad gaar ah u leeyahay maamul goboleedyada, isla markaana ay door ku yeeshaan dib u eegista dasuurka.
Abuukaate Maxamed Cabdala Saalax ku-simaha Guddoomiyaha Guddiga Madaxa banaan ee hirgelinta dastuurka ayaa sheegay in dastuurku yahay wax ay wada leeyihiin guud ahaan Ummadda Soomaaliyeed.
Xildhibaan Ibraahim Saalax Dayfullah Guddoomiye ku-xigeenka kormeerka baarlamaanka ee dastuurka ayaa hoosta ka xariiqay in waqtigan uu yahay mid kooban loona bahan yahay in siwada jir ah looga wada shaqeeyo arrimaha dastuurka Soomaaliya.
Ra’iisul wasaare ku-xigeenka Dalka Mudane Maxamed Cumar Carte Qaalib oo furay shirka wada tashiga ayaa kula dardaaramay ka qayb galayaasha shirka in ay si wanaagsan kaga doodaan qodabada qilaafka keeni kara, sida awoodaha Dowladda Federaalka ah iyo dowladda goboleedyadda xubnaha ka noqonaya Federaalka.
Dastuurka KGM ah ee dalka oo ka kooban 15 cutub ayaa u baahan in dib u eegis lagu sameeyo, kadibna la geliyo afti dad wayne, si loooga dhigo dastuur rasmi ah oo uu yeesho dalkeena.
Sawir Qaade:- Farxaan Suleymaan Daahir
