Shirkaan looga hadlayey siddii ganacsiga Soomaaliyeed kor loogu qaadi lahaa oo uu daah furey Wasiirka Ganacsiga iyo Warshadaha Xukuumadda federaalka Soomaaliya, ayaa waxaa ka qeyb galey in ka badan 150 Shirkadood, oo isugu jira ganacsiyada Beerlayda, Kalluumeysatada, kuwo leh Warshadaha yar yar iyo ganacsato u dhalatay dalka Talyaaniga oo Soomaalia u yimid siddii ay maalgashi uga sameysan lahaayeen.
Safiirka dowlada Talyaaniga ee Soomaaliya u fadhiya Danjire Carlo Campalina oo ka qeyb galay shirka, ayaa sheegey in labada dowladood inuu u dhexeeyo ganacsi fog oo soo jireen ah.
Guddoomiyaha Rugta Ganacsiga Soomaaliyeed Mudane Maxamuud Cabdikariin Gabeyre, ayaa sheegay in shirkan uu ahmiyad gaar ah siinayo ganacsatada Soomaaliyeed, isagoo xusay inay fursad u noqon doonto.
Wasiirka Ganacsiga iyo Warshadaha Xukuumadda Federaalka Soomaaliya Mudane Maxamed Cabdi Xayir Maareeye oo furey kulankaan oo soconaaya labo maalmood, ayaa sheegay in muhiim ay tahay koboca dhaqaalaha dalka sare loo qaado, isagoo intaa ku daray in ganacsatada ka yimid dalka dibadiisa ay fursad u heli karaan inay maalgeshi ku sameystaan gudaha Soomaaliya.
