Wasiirka Arrimaha Gudaha ee Xukuumadda Soomaaliya ayaa kafuray magaalada Muqdisho Shir looga hadlayo Xasilinta Deegaanada laga saaray Maleeshiyada Al Shabaab.
Shir looga hadlayo xasilinta goobaha lagala wareegay kooxda Argagixisada ah ee Al-shabaab ee Gobolka Shabeelaha hoose ayaa uu furmay magaalada Muqdisho.
Maalmihii ugu dambeeyay ayaa waxaa ka socday Gobolkaas howlgalo Ciidanka xooga dalka kaga saarayaan Maleeshiyadda Al Shabaab deegaanada Shabeellaha Hoose kaga sugan yihiin kuwaas oo dadka shacabka ah mudo badan ku dhibaataynayay.
Waxaa looga hadlay sidii dadka deegaanada Al Shabaab laga saaray lagu gaarsiin lahaa Gargaarka ay u baahan yihiin iyo waxyaabaha aadka muhiimka ugu ah quutul daruuriga.
Shirka waxaa ka soo qeyb galay dhamaan hay’adaha taageero xasilinta dalka iyo dowladaha saaxiibada la ah dowlada federaalka Soomaaliya.
“waxaan soo dhaweynayaa howlgalada Ciidanka xooga dalka ay ka wadaan gobolka Shabeelaha hoose kaas la doonayo in dib loogu xureeyo deegaanada ka maqan gacanta Dowladda” waxaa yiri Wasiirka Arrimaha Gudaha Federaalka iyo Dib u heshiisiinta Mudane Cabdi Maxamed Sabriye .
