Shir madaxeedka Midowga Africa ayaa maanta oo Axad ah ka furmaya Magaalada Addis-Ababa ee xarunta Dalka Itoobiya,kaasi oo ay ka qeybgalayaan hoggaamiyaasha wadamada Qaaradda Afrika.
Madaxweynaha Jamhuuriyadad Federaalka Soomaaliya Mudane Maxamed C/llaahi Farmaajo iyo wafdi uu hoggaaminayo oo kusugan magaaladaasi Addis-Ababa ayaa ka qeybgalaya shirkaasi hoggaamiyaasha Midowga Africa,isagoo lafilayo in halkaasi oo khudabad ka jeediyo.
Ajandayaasha shirkaasi looga hadlayo waxaa kamid ah ladagaalanka Musuqa,Arggagixisada iyo xoojinta amniga iyo nabadageliyada wadamada Qaaradda Afrika,gaar ahaan kuwa xasaraduhu ay ka jiraan.
Shirkan oo ah kii 30-aad ee Madaxda Afrika isugu yimaaddaan ayaa socon doona muddo labo maalmood ah, waxaana sanadkaan si gaar ah looga hadli doonaa xoojinta dagaalka lagula jiro musuqmaasuqa oo ay hoggaamiyeyaasha Afrika si wadajir ah uga shaqeyn doonaan.
Madaxweynaha Soomaaliya iyo wafdigiisa ayaa inta uu joogo magaalada Addis-Ababa waxaa lafilayaa in uu kulamo kaladuwan la yeesho qaar kamid ah hoggaamiyaasha Afrika ee ka qeybgalaysa madasha shirkaasi,isagoo kala hadlidoona arimo ay kamid yihiin iskaashiga labada dhinac,iyo sidii Soomaaliya oo guluf kula jirta maleeshiyada Alshabaab loo garab istaagi lahaa.
