Shirka caalamiga ah ee badqabka Saxafiyiinta oo labadii maalin ee la soo dhaafay ka socday magaalada Muqdisho ee caasimadda Soomaaliya ayaa dhinacyada ka qeyb galay oo ka kala socday dowladda Federaalka Soomaaliya, warbaahinta madaxa banaan, Bulshada Rayidka iyo beesha caalamka waxa ay isku raaceen in la sameeyo gudigga Qaran ee Badqabka Wariyayaasha Soomaaliyeed iyo sameynta habraac mideysan oo lagu wajaho baqabka wariyaha.
Sii hayaha Wasiirka Warfaafinta, Dhaqanka iyo Dalxiiska Xukuumadda Soomaaliya ahna Wasiir ku xigeenka wasaaradda Mudane Cabdiraxmaan Iidaan Yoonis oo soo xeray shirka ayaa ku dhawaaqay sameynta Gudigga Qaran ee Badqabka saxafiyiintaoo ka kooban 11 xubnood oo ka kala imaanaya Dowladda, Warbaahinta iyo Bulshada rayidka si looga hortago tacadiyada ka dhanka saxafiyiinta, isaga oo sheegay in dowladda federaalka ay ka go’an tahay ilaalinta badqabka wariyaha.
Agaasimaha Guud ee wasaraadda Warfaafinta Mudane Cabdiraxmaan yuusuf Sheekh (Alcadaala) ayaa shaxray muhiimada dhismaha gudiggan waxa uu tilmaamay inuu sameynayo habraac sax oo ku aadan badqabka suxufiga iyo la socodka xaaladaha soo wajaho, waxaana uu intaa ku daray in Soomaaliya ay noqotay waddankii ugu horeeyay ee ku yaala geeska Afrika oo hirgaliyay ol olaha caalamiga ah ee badqabka saxafiyiinta..
ka qeyb galayaasha shirka waxay soo dhaweeyeen natiijada shirka iyo sida wasaradda warfaafinta ee Soomaaliya ay go’an tahay xoojinta badqabka saxafiga.
John Bosca Mayiga oo ka socday Hey’adda UNESCO ee qaramada midoobay oo taageertay shirkaan iyo Afhayeenka Xafiiska Qaramada Midoobay ee Soomaaliya Joy Contrast waxa ay sheegeen in caalamka uu taageerayo waxwalba oo kor u qaadaya badqabka saxafiga.
Shirkan ayaa ahaa kii ugu horeeyay oo nuuciisa ah oo lagu qabto Soomaaliya, waxaana uu xoojinaya in wadajir la isaga kaashado badqabka Wariyayaasha Soomaaliyeed
Cabdishakuur Cali Axmed
