Shirka qiimeynta iyo jiheynta qorshaha Wasaaradda Warfaafinta Xukuumadda Soomaaliya ee labadii maalin ugu dambeysay ka socday magaalada Muqdisho ayaa lagu wadaa in maanta la soo gabagabeeyo.
Shirkan oo ah mid lagu qiimeynayo waxyaabihii u qabsoomay Wasaaradda Warfaafinta sanadkii la soo dhaafay ee 2018-ka iyo qorshaha u degsan sanadkan 2019-ka ayaa mudada laboo cisho ee la soo dhaafay diirada lagu saaray waxqabadka Waaxyaha Wasaaradda Warfaafinta iyo in shaqada hadda socoto loo diyaariyo waxa asalka ah si loogu fur-furnaado shaqada Wasaaradda warfaafinta loo igmaday.
Agaasimaha Waaxda Qorsheynta ee Wasaaradda Warfaafinta Xukuumadda Soomaaliya Cabdiraxmaan Axmed Xuseen oo la hadlay Radio Muqdisho ayaa sheegay in labadii cisho ee ugu horeeyay shirka looga hadlay sidii Waxqabadka waaxyaha Wasaaradda loo qiimeyn lahaa loona dar dar gelin lahaa howlaha socda.
Sidoo kale,Agaasime Cabdiraxmaan Axmed Xuseen ayaa xusay in qorshaha maanta ee kulanka looga hadlayo ay tahay qorshaha sanadka 2019-ka ay Wasaaradda Warfaafinta degsatay sidii dib u eegis loogu sameyn lahaa iyo sidii waxqabadka Dowladda loogu soo bandhigi lahaa Shacabka Soomaaliyeed.
Shirkan oo 16-kii bishan furmay ayaa waaxyaha qaar ee Wasaaradda Warfaafinta waxay ku soo bandhigeen howlahooda shaqo ee hadda iyo kan mustaqbalka u degsan iyo sidii loo gaari lahaa halbeegyada u ah Waaxyaha Wasaaradda Warfaafinta Dhaqanka iyo Dalxiiska Xukuumaadda Soomaaliya,waxaana lagu wadaa in maanta la soo gabagabeeyo.
