Shir looga hadlayo Wadatashiga horumarinta Afka Hooyo ayaa maanta ka furmay magaalada Muqdisho.
Shirkan oo ay soo qaban qaabisay Akadeemiyada Cilmiga, Dhaqanka iyo Suugaanta ayaa waxaa ka qeyb galay 50 qof oo isugu jirta macalimiin iyo Aqoonyahanno Afka Soomaaliga ku xeeldheer, kaasi oo socon doono muddo saddex cisho ah.
Guddoomiyaha Akadeemiyada Cilmiga, Dhaqanka iyo suugaanta Mudane Cabdiqaadir Nuur Xuseen Maax oo la hadlay Radio Muqdisho ayaa sheegay in shirka wadashiga uu yahay mid ay isugu yimaadeen aqoonyahanno Soomaaliyeed, diiraddana lagu saari doono horumarinta Afka Hooyo.
“Shan Maamul Goboleed ayaan macalimiinta iyo aqoonyahanno afka ku xeer dheer ka soo aruurinay, kuwaasi oo ka kala socda Maamulada Jubbaland, Koonfur galbeed, Hirshabeelle, Galmudug iyo Puntland, halka Gobolka Banaadir laga soo kala aruuriyay macalimiinta Afka ku xeer dheer iyo aqoonyahannada Akadeemiyada ka socda” ayuu yiri Maax.
Mudane Cabdiqaadir Nuur Xuseen Maax ayaa tilmaamay in ka qeyb galayaasha ay ka doodi doonaan toban qodob oo muhiim u ah horumarinta Afka Hooyo.
