Shirkaan oo socday muddo shan cisho ah ayaa looga hadlay beeca iyo diinta Islaamka waxa ay ka qabto, gaar ahaan sarifka online-ka ee Forex loo yaqaan oo maalmahan aad loo hadal haayay.
Shirkaan oo ka socday xarunta Islaamiga ah ee Towxiid ee Kampala ayna kasoo qayb galeen culumaa’udiin caan ka ah gudaha Soomaalida, sida Sheekh Cabdirashiid Sheekh Cali Suufi iyo Sheekh Mustafa Xaaji Ismaaciil Haaruun iyo culumo kale oo haysta darajada cilmiga ee P.H.D oo la xariirta dhaqaalaha islaamka.
Shirkan oo lasoo gabagabeeyay ayaa ugu dambeyntii laga soo saaray war-murtiyeed dhowr qodob ah oo ay ugu muhiimsanayd cambaarayn iyo tacsi loo diray dadkii ku waxyeeloobay qaraxii dhawaan ka dhacay Ex-koontarool Afgooye ee Magaalada Muqdisho, iyadoona la sheegay in falkaas ahaa fal aad u guracan.
Sidoo kale war-murtiyeedkaas oo nuqul ka mid ah ay heshay warbaahinta Qaranka ayaa loogu baaqay ganacsatada Soomaaliyeed ee ka shaqeysata arrimaha sarifka in ay ka fogaadaan wax walba oo shaki galinaya xalaalnimada ganacsigooda.
Munaasabadii soo afjarista shirka oo ay ka hadleen culumada kala ah Sheekh Cabdirashiid Sheekh Cali Suufi iyo Sheekh Mustafe Xaaji Ismaaciil Haaruun ayaa ka mahadnaqay sida qiimaha lahayd ee loosoo dhaweeyay intii uu shirkan socday, iyagoo ku baaqay in diinta Islaamka la barto, lana qaato fahanka saxda ah ee diinteenna Islaamka.
Sanad walba xilligan oo kale ayaa la qabtaa shirkaan islaamiga ah oo looga hadlo arrimo quseeya diinteenna Islaamka iyadoo sanadkaan uu ahaa kii 12-aad.
