Ugu yaraan Laba Qof ayaa u geeriyootay ku dhowaad Konton kalana way la Il-daran yihiin, markii uu Cudurka Shuban Biyoodka ka dillaacay Magaalada Mandheera ee Waqooyi bari Kenya.
Saraakiisha Caafimaadka Mandheera ayaa sheegaya inay Isbitalka Mandheera jiifaan 52 Qof oo Dadka degaanka ah, waxanay cabsi ka muujinayaan inay xaaladdu faraha ka baxdo ama ay tiradu intaa ka badato.
Cali Nuur Deeroow, oo ka tirsan maamulka degaanka War guduud oo ka tirsan Mandheera ayaa Daily Nation u sheegay inay qabaan wal-wal ku aaddan inay badato dhimashada iyo Dadka uu soo ridanaya Shuban Biyoodka.
Mr; Deeroow, ayaa intaa raaciyay in 20 ka mid ah Dadka xanuunsanaya ay yihiin Dad waaweyn, halka 32-ka kalana ay yihiin Carruur, kuwaasoo intooda badan laga keenay Tuulooyinka ku xeeran Mandheera.
Shuban Biyoodkan ka dillaacay Mandheera iyo nawaaxigeeda ayaa loo aanaynayaa daadad ka dhashay fatahaadda Webiga, markii ay halkaasi ka da’een Roobab lixaad leh oo barakiciyay Dad badan.
