Madaxweyne ku-xigeenka hay’adda cilmibaarista iyo tababarada ee Raadiyaha iyo maamulka Telefishinka Ms. Liu Ying ayaa tababar uga furtay magaalada Beijing ee xarunta dalka Shiina ku dhawaad 50 saxafi.
Munaasabad kooban oo lagu qabtay xarunta Cilmibaarista iyo tababarada ee dalka Shiinaha ayaa waxaa ka qeyb galay 45 saxafi oo ka kala socday 15 dal, iyadoo dowladda Soomaaliya ay tababarkaasi uga qeyb galeen 4 saxafi oo ka socday Wasaaradda Warfaafinfa.
Ms. Liu Ying ayaa sheegay in ujeedka tababarka uu yahay sidii sare loogu qaadi lahaa xirfadda saxafiga, isla markaana loo sameyn lahaa madal ay saxafiyiinta isku weydaarsadaan qibradahooda.
“Waxaan halkan isugu keenay suxufiyiin badan oo leh qibrad, anaguna waxaan diyaar u nahay inaan idinku biirino fikrado badan oo dhanka horumarinta saxaafadda ah, bishii december ee sanadki tegay waxaan tababar u qabanay 4,175 saxafi oo ka kala yimid 152 dowladood ah” ayay tiri Ms. Liu
Sidoo kale Ms. Zhou Jihong oo ah kuxigeenka agaasimaha guud ee qeybta xiriirka caalamiga ah ayaa sheegtay in sanadkasta ay qabtaan tababarada nuucaani oo kale ah.
Qaar ka mid ah ka qeyb galayaasha oo munaasabadda ka hadlay ayaa tilmaamay inay diyaar u yihiin sidii ay aqoon dheeraad ah uga kororsan lahaayeen quburada bixineysa tababarka.
Siminaarkan ayaa socon doono muddo 20 cisho ah, kaasi oo lagu qaadan doono casharo la xiriira iskaashiga iyo horumarinta Warbaahinta, iyadoo la adeegsanayo aaladda casriga ah ee internet-ka
