Ku dhawaad Lixdan qoys oo Soomaali ah oo kasoo carartay qala-laasaha ka taagan dalka Yemen ayaa maanta gaaray magaalada Boosaaso ee xarunta gobolka Bari.
Qoysaskan ayaa ka soo cararay rabshadaha ka socda dalka Yemen, kuwaasi oo soo raacay doonyo yar yar, iyadoo lagu soo dhaweeyay magaalada Boosaaso.
Qaar ka mid ah qoysaskii ka soo barakacay dagaallada Yemen oo lahadlay Warbaahinta Qaranka ayaa sheegay in Soomaalida ku nool dalkaasi ay haysato dhibaatooyin kala duwan, kuwaasi oo qaarkood lagu qaldo dad u dagaallamaya maleeshiyaadka mucaaradka ee xuutiyiinta.
Qaar ka mid ah dadkii la hadlay Warbaahinta Qaranka ayaa yiri: “Kuwa mucaaradka dadku way qalayaan, dowladdii ay u arkaan in dadkooda ay ka dagaalamayaan gudaha Yemen, mararka qaar waxaa jirta inay isku qaldaan dad iyaga u dagaalamaya oo aan Soomaali ahayn, balse dalalka kale oo Afrikaan ah ka soo jeeda, dhibaato badan ayay qabaan Soomaalida ku xaniban Yemen, waxaan ka codsaneynaa dowladdu in ay u gurmato dadka dalkaasi ku xaniban”
Guddoomiyaha Gobolka Bari Cabdisamad Maxamed ayaa sheegay inay u diyaar garoobeen sidii ay u soo dhaweyn lahaayeen muwaadiniinta Soomaaliyeed ee ka soo cararaysa dalka Yemen.
