Madaxda iyo ciyaartoyda xiriirka Soomaaliyeed ee Shataranjiga iyo qaar kamida bahda ciyaaraha ayaa garoonka caalamiga ah ee Aadan Cadde ee magaalada Muqdisho kusoo dhaweeyay ciyaaryahan Cabduqaadir Maxamed Warsame oo guul taariikhiya kasoo hoyay tartanka shataranjiga ee shaqsiyaadka Qaaradda Afrika ee AFRICA INDIVIDUAL CHESS CHAMPIONS oo lagu qabtay dalka Burundi, kaas oo ay Soomaaliya markeedii ugu horeeyay ku guuleysatay.
Tartanka oo ay ku baratameyn 8 wadan oo Qaarada Afrika ah ayuu kaalinta koowaad ka galay ciyaaryahan Cabduqaadir Maxamed Warsame oo 9 wareeg oo uu ciyaaray kaga adkaaday ciyaartoy ka kala socotay dalalka South Afrika, Zambia, Algeria, Ivory cost, Kenya, Uganda iyo Burundi
Ku-simaha gudoommiyaha gudiga olimbikada Soomaliyeed ahna Gudoomiyaha xiriirka shataranjjga Axmad Cabdi Xasan Wataac iyo bahda shataranjiga ayaa soo dhaweynta kadib munaasabad dhiirigelin ah oo ay u sameeyeen ciyaaryahanka oo ay ku amaaneyn sida sharafta leh ee uu u difaacay calanka dalkeena.
Ciyaaryahan Cabduqaadir Maxamed Warsame oo ka hadlay madasha ayaa xusay inay guushan u tahay Riyo u rumoowday, wuxuuna tilmaamay inuu sii wadi doono difaacidda dalkiisa.
Guddoomiye Ku-xigeenka xiriika Soomaliyeed ee shataranjiga Mahad Daahir Maxamed oo hogaaminayay xidigaha soo hoyay guusha weyn, ayaa xusay inay Soomaaliya guushan u tahay mid taariikhiya, wuxuuna dhinaca kale tilmaamay inay dhawaan ka qeyb gali doonaan tartan kale oo caalami ah oo ka dhici doona dalka Greece.
