Munaasabada oo ka dhacday Degmada Diinsoor ee Gobolka Baay oo u jeedkeeduna ahaa caleemo saarka Suldaanka cusub ee la doortay ee beesha Dabarre Suldaan Cabdiwahaab Suldaan MaxamedNuur Suldaan Sheekh Xuseen Dabarre ayaa waxaa ka qeyb galay Xildhibaanno ka tirsan Koonfur Galbeed, Qaar ka mida ugaasyada Koonfur Galbeed ee ka tirsan odayaasha dhaqanka Soomaaliyeed 135 ahaa, Salaadiin, nabadoono, Culimaa’udiin uu ka midyahay Sheekh Cabdimajiid Sayid Xaaji Ibraahim, maamulka degmada Diinsoor iyo qeybaha kala duwan ee bulshada.
Qaar ka mida salaadiinta iyo nabadoonada munaasbadda ka hadlay ayaa dadka reer Diinsoor kula dardaarmay inay la shaqeeyaan suldaanka cusub oo badalay Alle ha u naxariistee walaalkii oo dhawaan geeriyooday.
Xildhibaan Cismaan Nuur Aadan oo ka mida Xildhibaannada koonfur galbeed iyo Guddoomiyaha Degmada Diinsoor Cabdisalaan Xaaji Siidow ayaa xusay inay si hagar la’aan ah ula shaqeyn doonaan Suldaanka cusub.
Suldaan Cabdiwahaab Suldaan Maxamed Nuur Suldaan Sheekh Xuseen Dabarre oo gabagabadii munaasabadda ka hadlay ayaa ku baaqay in si wadjira looga wada shaqeeyo nabadda iyo xasiloonida, isagoo balan qaaday in uu si cadaalad ah ugu adeegi doono bulshada dooratay.
