Iyadoo maalmihii lasoo dhaafay ay soo shaac bexeen wararka sheegaya in ciidanka Nabad Sugidda Qaranka ay magaalada Muqdisho ku xireen Suldaan Faarax Maxamuud Maxamed oo kamid ah salaadiinta kasoo jeeda Gobolada Waqooyi ayaa Suldaanka oo manata Shir jaraa’id ku qabtay caasimadda Muqdisho, waxa uu sheegay inaysan ciidanka Nabadsugiida xirin isla markaana wararkaasi ay yihiin kuwa been abuur.
Suldaanka ayaa sheegay inuu si caadi ah u wadanayo howlaha soo xulista Xildhibaanada si lamid ah slaadiinta kale.
“Majirto waxa dhowr mar lagu cel celiyay oo ah inay i afduubteen ciidanka Nabab sugidda Qaranka, arintaa waxaa leeyahay majirto waxaa dhamaaday wixii la dhihi jiray afduubka, waxaa la marayaa in la ilaaliyo xuquuqda dadka, majirto wax xoriyad la’aan iyo caafimaad darro ah anigoona been sheegeynin”ayuu yiri Suldaan Faarax.
Dhinaca kale Taliye ku-xigeenka Hay’adda Sirdoonka iyo Nabadsugidda Qaranka Ismaaciil Daahir Cismaan oo shir jaraa’id ku qabtay xarunta Taliska Hay’adda ee magaalada Mqudisho ayaa sheegay in Ciidanka Nabadsugidda aanay wax faragalin ah kulaheyn arrimaha doorashooyinka marka laga reebo sugidda Amniga doorashooyinka, wuxuuna digniin u diray dad uu sheegay inay warar been abuur ah ka faafinayaan ciidanka amniga….
“Sidaa beryahaanba ka arkeyne idaacadaha iyo baraha bulshada oo ah in Hay’adda Nabadsugidda ay faragalin kuheyso howlaha doorashooyinka, isla markaana lagu eedeeyay falal aan waxba ka jirin, anaga hadaa nahay Hay’adda Nabadsugidda waxaan har iyo habeen u taaganahay sugidda amniga doorashooyinka, waana u digayaa shacabka Soomaaliyeed inay ka fogaadaan warraka nuucaasi oo kale ah” ayuu Taliye ku-xigeenka Nabad sugidda Qaranka.
