Tababarkaan ayaa waxa loo qabtay mudo labo maalin ah howl-wadeenno ka tirsan Xafiisyada Garyaqaanka Guud, Xeer-ilaalinta Qaranka, Wasaaradda Maaliyadda, Wasaaradda Dastuurka, Maamulka Gobolka Banadir, Bulshada Rayidka ah iyo qaar ka mid ah ardayda wax ka barata Jamacadaha Muqdisho.
Howl-wadeenada kala duwan ee ka soo qayb-galay tababarka ayaa sheegay in baahi badan loo qabo wada shaqeynta hey’adaha Sharciga ee dalka iyo dardar-galinta tababarro sidaan oo kale ah ee loo qabto howl-wadeennada kala duwan ee bahda Cadaaladda iyo qeybaha bulshada Soomaaliyeed.
Wasiirka Cadaaladda ee Xukuumadda Soomaaliya Mudane Xasan Xuseen Xaaji, oo tababarka soo xiray ayaa sheegay inay muhiim tahay in sharci kasta la waafajiyo Dastuurka dalka, si sharuucda dalka iyo Dastuurka KMG ah aysan iskaga hor imaan, lana helo sharuuc iyo Dastuur isla jaan-qaadi kara oo ka hirgala dalka heer Federaal iyo heer dowlad goboleed.
Wasiirka Cadaaladda ayaa kula dardaarmay xubnaha qaatay tababarkan in ay si daacadnimo iyo hufnaan leh ugu shaqeeyan dalkooda oo ay hirgeliyaan waxyaabaha ay ka barteen siminaarka.
