Tababarkan oo ku saabsanaa hoggaanka iyo hab dhiska wanaagsan ee maamulka oo ay soo qaban qaabisay Jaamacadda Somaville ee ku taala magaalada Muqdisho ayaa waxaa ka qeybgalay qaar ka mid ah ardayda Jaamacadda iyo arday kale, ayada oo ay goob joog ahaayeen mas’uuliyiinta iyo maamulka Jaamacadda waxaa sidoo kale joogay qaar ka mid ah madax lagu casuumay.
Xildhibaan Prof Cabdiraxmaan Xaaji Aadan Ibbi oo tababarka bixinayay ayaa si qoto dheer u falanqeeyay astaamaha wanaagsan ee laga doonayo hoggaamiyaha, habka ay tahay in loo maro hab dhiska maamulka, asaga oo looga tusaaleynayay habka maamul ee soo maray dunida sida ay u kala duwanaayeen iyo midka Islaamka ee waligii jiray.
Dr Cabdinuur Sheekh Axmed Guddoomiyaha Jaamacadda Somaville oo tababarka soo qaban qaabiyay ayaa sheegay in ay sii wadi doonaan tababarada noocaan ah, si dhallinyarada Soomaaliyeed kor loogu qaado aqoontooda iyo garaadka.
Jaamacadda Somaville ayaa inta badan xoogga saarta sidii ay u soo saari laheyd dhallinyaro ka dhisan aqoonta maadiga iyo midka Diiniga, ayada oo muhimada tahay sidii bulshada door muuqda ay uga noqon lahaayeen, isla markaana ay u jiheyn lahaayeen hogaanka iyo maamulka dalka.
