Taliyaha ciidanka Booliska Qaybta guud ee Gobolka Banaadir Gaashaanle Sare Farxaan Maxamuud Qaroole, Taliyaha Booliska Qaybta Waliyoow Cadde Kornayl Yaasiin Ganeey iyo Taliyaha Saldhiga ee Booliska Degmada Hodan Bashiir Durqan ayaa gabi ahaanba joojiyey dhisme sharci daro ah oo ku socday Hoteelkii Cabitaanada ee Taleex, kaas oo ay leedahay Wasaaradda Warfaafinta, Dhaqanka iyo Dalxiiska ee Soomaaliya.
Shaqsiyaadkii ku howlanaa dhismaha ay Dowladdu leedahay iyo shaqaale xiligaas gacanta kula jiray shaqada ayaa goobtaasi loogu tagay, waxaa ayna qaateen amarka ciidamada oo ahaa in ay joojiyaan dhismahaan maadama ay tahay denbi weyn iyo Qiyaano Qaran.
Gaashaanle Sare Farxaan Qaroole Taliyaha Ciidamada Booliska Qaybta Gobolka Banaadir oo Howlgalka hogaaminayey iyo saraakiishii kale ee lasocotay ayaa sidoo kale dhismaha ay joojiyeen warbixin ka siiyey Agaasimaha Guud ee Wasaaradda Warfaafinta Mudane Cabdullaahi Xayir Ducaale oo uu wehlinayey Agaasimaha Radio Muqdisho Codka Jamhuuriyadda Federaalka Soomaaliya Mudane Cabdicasiis Maxamuud Guuleed ( Cabdicasiis Africa)
Agaasimayaasha ayaa ku qancay howsha ay ciidamadu qabteen, waxaa ayna amar ku bixiyeen in laga feejignaado wixii hadda ka dambeeya dhisida Hoteelkii Taleex oo ah mid ka mid ah Guryaha Danta guud ee hoostaga Wasaaradda Warfaafinta, Dhaqanka iyo Dalxiiska Xukuumadda Federaalka Soomaaliya iyo dhamaanba hantida Qaran ee ay Wasaaradu leedahay.
Ugu danbeyntii waxaa halkaasi lagu soo gaba gabeeyay howlgalkii maanta oo ahaa mid kamid ah kuwa lagu ilaalinayo Hantida Ummadda ka dhaxeysa ee mararka qaar la isku dayo in si gaar ah loo gacan togaaleeyo.
