Taliska qaybta 60-aad Lixdamaad ayaa faah faahin ka bixiyay qasaaraha ka dhashay dagaal xalay ka dhacay deegaanka Goof-gaduud, iyagoo sheegay inay socdaan qorshayaal ay ku xoraynayaan deegaanada Argagixisa Al Shabaab ay kaga suganyihiin dalka.
Ismaaciil Khaliif Shire Abaanduulaha Qaybta Lixdamaad ee ciidamada xoogga Dalka ayaa Radio Muqdisho u sheegay in ciidanka xoogga dalka ay ku suganyihiin deegaanka ay maleeshiyada Al-Shabaab ay soo weerareen, isagoo intaa ku daray in ciidamada xoogga dalka iyo ciidanka dowlad goboleedka Koonfurgalbeed ay iska kaashadeen xoojinta iyo la dagaalanka Al-Shabaab
“Abaaro 4:30 ee aroornimo ayay ka soo weerareen xarunta labo jid oo kala ah jidka Manaas iyo kan Xawaale bar baar, waana u diyaar garownay, runtiina way ku jabeen duulanka ay soo qaadeen dhagar qabayaasha Shabaabku, waxaana looga dilay 15 ka tirsan Al-Shabab, waana joogteyneynaa howlgallada ka dhanka ah maleeshiyada Al-Shabaab” ayuu yiri Ismaaciil Khaliif.
Abaanduulaha Qaybta Lixdamaad ee ciidamada xoogga Dalka ayaa tilmaamay in ciidamada ay sii xoojin doonaan howlgallada ka dhanka ah Al-Shabaab, waxaana uu intaa raaciyay in dhawaan ciidamada ay qorsheynayaan sidii guud ahaan meelaha ay Shabaabku ku dhuumaaleysanayaan looga saari lahaa.
