Taliyaha Ciidanka Asluubta Sareeye Gaas Xuseen Xasan Cismaan ayaa sheegay inay dib u dhisayaan Xaruntii Taliska uu ku lahaa KM7 ee magaalada Muqdisho, kaddib markii uu kormeer ku tegay halkaasi.
Jeneraal Xuseen Xasan Cismaan oo kormeeray Xafiisyadii ay ku shaqeyn jireen Saraakiisha iyo Ciidamada Asluubta ayaa sheegay in dib u habeynta Xaruntaan ay wax badan ka tari doonto dar dargalinta howllaha horyaalla ciidamada Asluubta.
“Waxaan dib u dhiseynaa Xaruntaan, waxaa gaaray burbur xooggan, inaga oo kaashaneyna Hay’adaha Caalamiga ee na kaalmeeya iyo Dowladda ayaa rabnaa in aan dib u dhis ku sameyno xaruntan” ayuu yiri Taliya Ciidanka Asluubta.
Taliyaha Ciidanka Asluubta ayaa dhan kale ka digay iibsashada hantida Asluubta oo ay ka mid tahay dhismayaashii uu lahaa Taliska, isaga oo xusay in cid kasta oo isku deyda arrintaasi ay tallaabo ka qaadayaan .
“Waxaan kale oo aan halkaan ka cadeynayaa in aan aqbali doonin hantida Asluubta oo ay ka mid tahay xarumaha in la dego ama la iibsado cid kasta oo ku howlan kama aqbaleyno” ayuu hadalkiisa ku daray.
Waa booqashadii ugu horeysay ee uu Taliyaha cusub ee Ciidamada Asluubta Sareeye Gaas Xuseen Xasan Cismaan ku tego Xarunta Taliska tan iyo markii uu la wareegay toddobaad ka hor.
