Taliyaha ciidanka booliska Soomaaliyeed Sareeyo Gaas Maxamed Sheekh Xasan Xaamud iyo wafdiga uu hogaaminayo oo isugu jiray saraakiil ka socotay AMISOM, Qaramada Midoobay iyo kuwa ka tirsan booliska Soomaaliyeed oo gaaray magaalada Baydhabo ayaa maanta tababar magaaladaasi 200 askar oo ka mid noqonaya ciidanka booliska u furay.
Munaasabad kooban oo lagu qabtay Badhabo ayaa waxaa ka qeyb galay ku-simaha Madaxweynaha Maamulka Koonfurgalbeed ee Soomaaliya, xubno ka tirsan maamulkaasi iyo mas’uuliyiin kale.
Cabdiraxmaan Ibraahim oo ah ku-simaha Madaxweynaha Maamulka Koonfurgalbeed oo goobta hadal kooban ka jeediyay ayaa sheegay in askartan cusub looga fadhiyo inay ka faa’iideystaan oo ay beri ugu adeegan bulshadeena.
“Waxaan ku faraxsanahay in wafdigan uu hogaaminayo Taliyaha Ciidanka booliska aan ku soo dhaweyneyno Baydhabo oo aan kala qeyb galno tababarka ciidanka cusub loo furayo, waxaana ku bogaadinayaa inay ka faa’iideystaan tababarka” ayuu yiri Cabdiraxmaan Ibraahim
Taliyaha ciidanka booliska Soomaaliyeed Sareeyo Gaas Maxamed Sheekh Xasan Xaamud oo furay tababarka oo furay tababarka ayaa sheegay in askartan cusub looga baahanyahay inay la yimaadaan dulqaad fara badan oo ay ilaaliyaan anshaxa looga baahanyahay askarta.
“Dadka habeenkii jiifa, kuwa ganacsanaya idinka ayay idinku soo jeedaan, marka waxaa la idinka rabaa in aad bad baadisaan nafta iyo hantida dadka, waajibka kowoaad ee idinka rabo waaye, ee u guta sida uu sharci qabo, una istaaga in aad dadkaasi cadowga ka difaacdaan” ayuu yiri Taliyaha booliska
Taliyaha ciidanka booliska ayaa ugu dambeyntii ciidamada cusub ku wareejiyay shan neef oo geel ah, waxaaana ay tani qeyb ka tahay qorshaha taliska ciidanku uu ku doonayo in sare loo qaado tababarada la siinayo ciidamada booliska iyo dhalinyarada dooneysa inay ka mid noqdaan.
Taliyaha iyo wafdiga la socda ayaa waxa ay dib ugu soo laabteen magaalada Muqdisho.
