Xarunta Taliska guutada 7aad ee ciidanka Xoogga Dalka ee Degmada Afgooye ee Gobolka Shabeelaha Hoose waxaa maanta lagu qabtay munaasabad uu xilka kula wareegayay Taliyaha guutada 7aad qeybta 60aad ee Ciidanka Xoogga Dalka Soomaaliya Gaashaanle Dhexe Cumar Cabdiraxmaan Abuukar, iyadoo munaasabadda xil wareejinta ay ka qeyb galeen saraakiisha ciidanka xoogga dalka iyo marti sharaf kale.
Gaashaanle Sare Xasan Maxamed Abuukar (Xasan Jaamici) Taliyihii hore ee guutada 7aad qeybta 60aad ee ciidanka oo xilka wareejiyay ayaa ka sheekeeyay waxyaabaha u qabsoomay, isagoo u rajeeyay Taliyaha cusub in uu howsha halkiisa ka sii wado.
Taliyaha guutada 7aad qeybta 60aad ee ciidanka xoogga dalka Gaashaanle Dhexe Cumar Cabdiraxmaan Abuukar ayaa balan qaaday in uu dar dargelin doono howsha loo igmaday ee horyaalla, waxaana uu ciidanka ka dalbaday inay u diyaar garoobaan sidii argagixisada Al-Shabaab looga ciribtiri lahaa guud ahaan Gobolka Shabeelaha Hoose.
Gaashaanle Dhexe Cumar Cabdiraxmaan Abuukar oo horey xilal ciidan oo kala duwan u soo qabtay dowladda ayaa looga fadhiyaa in uu xoojiyo doorka uga aadan xoreynta goobaha Al-Shabaab ay kaga dhuumaaleysanayaan degaannada Gobolka Shabeelaha Hoose.
