Taliska ciidanka Boliiska magaalada Dhusamareb ee xarunta maamulka Galmudug ayaa soo dhowayn u sameeyey taliye ku-xigeenka Booliiska Soomaaliya Sareeye Guuto Cismaan Maxamed Cabdullaahi, waxa uuna warbixin ka dhagaystay taliyaha Booliiska Dhusamareb Gaashaanle Cabdullaahi Xassan Macallin.
Taliyaha saldhiga Boliiska magaalada Dhuusamareeb ayaa taliye ku xigeenka uga warbixiyay xaaladaha ay ku shaqeeyaan ciidamada iyo sidoo kale guulaha ay ka soo hooyeen xaqiijinta amniga magaalada Dhuusamareeb oo lagu wado in ay dhawaan marti galiso shirar dib loogu dhisayo hay’adaha maamul goboleedka Galmudug.
Taliye ku xigeenka Ciidanka Boliiska Soomaaliyeed Sarreeye Guuto Cismaan Maxamed Cabdullaahi ayaa saraakiisha iyo ciidamadaba uga mahad celiyay shaqo wanaagsan ee ay ummada u hayaan, waxa uuna si gaara ugu amaanay kaalintii amni xaqiijinta aheyd ee ka qaateen ee shirkii dib u heshiisiinta Galmudug ee halkaasi lagu soo gaban-gabeeyay.
