Tartan cilmiyeedka bisha Ramadaan oo galay sanadkii kow iyo tobnaad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho habeen waliba ayaa waxaa caawa kulankiisa 22-aad ee wareegga 2aad ku tartamay degmooyinka Buula-burte iyo Kaaraan oo ka kala tirsan Gobollada Hiiraan iyo Banaadir. waxaana barnaamijka sanadkii 2aad oo xiriir ah taaba-gelineya Bangiga IBS.
Tartameyaasha labada degmo ee Buula-burte iyo Kaaraan ayaa muujiyey tartan aad u adag, isla markaana ahaa mid xiiso gaar ah xambaarsan, iyagoo soo bandhigay aqoon iyo asluub wanaag labada dhinac inta uu tartanka socday.
Buula-burte
Tartameyaasha Degmada Buula-burte ee Gobolka Hiiraan, waxaa la weydiiyey todobo Su’aal, todobadii su’aal ee la weydiiyay waxa ay ka jawaabeen Shan su’aal, halka ay iska qaldeen Labo su’aal, Ma jirin wax ka faa’iideysi ah oo ay heleen. sidaa darteed wadarta guud ee dhibcaha tartameyaasha Degmada Buula-burte ay heleen waxay noqotay Toban (10) dhibcood.
Kaaraan
Tartamayaasha Degmada Kaaraan ee Gobolka Banaadir waxaa dhankooda la weydiiyay todobo su’aal, waxa ay ka jawaabeen Shan su’aal, iyagoo iska qalday Labo su’aal, Ma jirin wax ka faa’iideysi ah oo ay heleen, sidaasi darteed wadarta guud ee dhibcaha ay heleen tartameyaasha Degmada Kaaraan waxay noqotay Toban (10) dhibcood.
Sida sharciga tartanka uu dhigayo marka ay labada degmo noqdaan isku dhibco waxaa lagu daraa su’aalo dheeri ah si loo kala saaro tartamayaasha labada degmo, oo midkood ay ugu gudubto wareegga xiga ee tartanka. Waxaana su’aalihii dheeriga ahaa ee lagu daray ay tartamayaasha Buula-burte ka jawaabeen su’aashii 8aad ee tartanka, halka tartamaayasha Kaaraan ay dhankooda iska qaldeen su’aashii dheeriga ahayd, sidaasna waxaa ay tartamaayasha Degmada Buula-burte ay la yimaadeen 12 dhibcood, halka Kaaraan ay heysato 10 dhibcood.
Hadaba kulankii 22-aad ee tartan Cilmiyeedka bisha Ramadaan ee Warbaahinta Qaranka caawa waxaa wareegga 3aad u soo gudbay tartamayaasha Degmada Buula-burte ee Gobolka Hiiraan, ayadoo gebagebadii ay labada tartame isugu hambalyeeyeen guushaasi.
Habeen dambe haddii uu Alle idmo oo ah habeenka 21-aad ee tartanka, kulankiisa 23-aad waxaa ku tartami doona degmooyinka Gaalkacyo iyo Howlwadaag oo ka kala tirsan Gobollada Mudug iyo Banaadir.
Sawir qaade:- Sakariye Shiddo
