Tartan cilmiyeedka bisha Ramadaan oo galay sanadkii saddex iyo tobnaad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho habeen waliba ayaa waxaa caawa kulankiisa 31-aad ee kama dambeysta ah (Final) ku tartamay Degmooyinka Dhuusamareeb iyo Gaalkacyo oo ka kala tirsan Gobollada Galgaduud iyo Mudug, waxaana barnaamijka si wadajir ah u taaba-gelinaya Bankiga IBS iyo Maamulka Gobolka Banaadir.
Tartameyaasha labada degmo ee Dhuusamareeb iyo Gaalkacyo ayaa muujiyey tartan aad u adag, isla markaana ahaa mid xiiso gaar ah xambaarsan, iyagoo soo bandhigay aqoon iyo asluub wanaag labada dhinac inta uu tartanka socday.
Dhuusamareeb
Tartameyaasha Degmada Dhuusamareeb ee Gobolka Galgaduud waxaa la weydiiyey todobo Su’aal, todobadii su’aal ee la weydiiyay waxa ay ka jawaabeen Saddex su’aal, halka ay iska qaldeen Afar su’aal, waxa ay ka faa’iideysteen Hal su’aal oo soo hareermartay Tartamaayasha Degmada Gaalkacyo, sidaa darteed wadarta guud ee dhibcaha tartameyaasha Degmada Dhuusamareeb heleen waxay noqotay Sideed (08) dhibcood.
Gaalkacyo
Tartamayaasha Degmada Gaalkacyo ee Gobolka Mudug waxaa dhankooda la weydiiyay todobo su’aal, waxa ay ka jawaabeen Labo su’aal iyagoo iska qalday Shan su’aal,, waxa ay ka faa’iideysteen Hal su’aal oo soo hareermartay dhigooda Dhuusamareeb, sidaa darteed wadarta guud ee dhibcaha ay heleen tartameyaasha Degmada Gaalkacyo waxay noqotay Lix (06) dhibcood.
Hadaba kulankii 31-aad ee tartan Cilmiyeedka bisha Ramadaan ee Warbaahinta Qaranka, isla markaana ahaa kulanka kama dambeysta ah ee tartanka caawa ku guuleystay tartamayaasha Degmada Dhuusamareeb ee Gobolka Galgaduud.
Barnaamijka sanadkan oo lagu soo kordhiyay su’aalo la weydiinayo dhageystayaasha iyo daawadayaasha ku taxan tartanka marka la gaaro qeybta dhextaalka ayaa caawa su’aashii dadweynaha la weydiiyay oo dul saarneyd 300$ ayaa waxaa ka jawaabay Nuur Ibraahim oo jooga degmadaHodan, kasi oo ku guuleystay abaal marin ay bixineyso Bankiga IBS.
Sanadkan waxaa kaalinta 1-aad galay tartameyaasha degmada Dhuusamareeb ee Gobolka Galgaduud, waxaana kaalinta 2-aad ku guuleystay tartamayaasha Degmada Gaalkacyo ee Gobolka Mudug, halka kaalinta 3-aad ee sanadkan ay ku guuleysteen tartameyaasha Degmada Hodan ee Gobolka Banaadir.
Sawir qaade: Khadar Cali Nuur
