Tartan cilmiyeedka bisha Ramadaan oo galay sanadkii Afar iyo tobnaad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho habeen waliba ayaa waxaa caawa kulankiisa 1-aad ee wareegga 1aad ku tartamay Degmooyinka Dhuusamareeb iyo Xudur oo ka kala tirsan Gobollada Galmudug iyo Bakool, waxaana barnaamijka si wadajir ah u taaba-gelineya Bankiga IBS iyo Maamulka Gobolka Banaadir.
Tartameyaasha labada degmo ee Dhuusamareeb iyo Xudur ayaa muujiyey tartan aad u adag, isla markaana ahaa mid xiiso gaar ah xambaarsan, iyagoo soo bandhigay aqoon iyo asluub wanaag labada dhinac inta uu tartanka socday.
XUDUR
Tartameyaasha Degmada Xudur ee Gobolka Bakool waxaa la weydiiyey todobo Su’aal, todobadii su’aal ee la weydiiyay waxa ay ka jawaabeen Saddex su’aal, halka ay iska qaldeen Afar su’aal, mana jirin wax ka faa’iideysi ah oo ay heleen, sidaa darteed wadarta guud ee dhibcaha tartameyaasha Degmada Xudur ay heleen waxay noqotay Lex (6) dhibcood.
DHUUSAMAREEB
Tartamayaasha Degmada Dhuusamareeb ee Caasimada Galmudug waxaa dhankooda la weydiiyay todobo su’aal, waxa ay ka jawaabeen Todobadii Su’aalood ay la weediiye iyo Labo Su’aal oo soo hareermartay Degmada Xudur, iyagoo iska qalday Saddex su’aal, ma jirin wax ka faa’iideysi ah oo ay heleen dhankooda, sidaasi darteed wadarta guud ee dhibcaha ay heleen tartameyaasha Degmada Dhuusamareeb waxay noqotay Sideed (18) dhibcood.
Sidaas darteed tartamayaasha Dhuusamareeb waxa ay heleen 18 dhibcood, halka Xudur ay la yimaadeen 6 dhibcood, sidaas ayayna ugu soo gudbeen Dhuusamareeb wareegga xiga ee tartanka.
Hadaba kulankii 1-aad ee tartan Cilmiyeedka bisha Ramadaan ee Warbaahinta Qaranka caawa waxaa wareegga xiga u soo gudbay tartamayaasha Degmada Dhuusamareeb ee Gobolka Galmudug, ayadoo gebagebadii ay labada tartame isugu hambalyeeyeen guushaasi.
Habeen dambe haddii uu Alle idmo oo ah habeenka 2-aad ee tartanka, waxaa ku tartami doona degmooyinka Xamar-iyo Garbahaaree oo ka kala tirsan Gobollada Banaadir iyo Gedo.
