Tartan cilmiyeedka bisha Ramadaan oo galay sanadkii saddex iyo tobnaad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho habeen waliba ayaa waxaa caawa kulankiisa 6-aad ee wareegga koowaad ku tartamay Degmooyinka Hodan iyo Ceelbuur oo ka kala tirsan Gobollada Banaadir iyo Galgaduud, waxaana barnaamijka si wadajir ah u taaba-gelineya Bankiga IBS iyo Maamulka Gobolka Banaadir.
Tartameyaasha labada degmoo ee Hodan iyo Ceelbuur ayaa muujiyey tartan aad u adag, isla markaana ahaa mid xiiso gaar ah xambaarsan, iyagoo soo bandhigay aqoon iyo asluub wanaag labada dhinac inta uu tartanka socday.
Hodan
Tartameyaasha Degmada Hodan ee Gobolka Banaadir waxaa la weydiiyey todobo Su’aal, ttodobadii su’aal ee la weydiiyay waxa ay ka jawaabeen Lix su’aal, halka ay iska qaldeen Hal, su’aal, ma jirin wax ka faa’iideysi ah oo ay heleen tartameyaasha Hodan, sidaa darteed wadarta guud ee dhibcaha tartameyaasha Degmada Hodan ay heleen waxay noqotay Labo iyo Toban (12) dhibcood.
Ceelbuur
Tartamayaasha Degmada Ceelbuur ee Gobolka Galgaduud oo ah markii ugu horeysay ebad ee ay tartanka ka soo qeybgalaan, waxaa dhankooda la weydiiyay todobo su’aal, waxa ay ka jawaabeen Afar, su’aal, iyagoo iska qalday Saddex su’aal, ma jirin wax ka faa’iideysi ah oo ay heleen, sidaa darteed wadarta guud ee dhibcaha ay heleen tartameyaasha Degmada Ceelbuur waxay noqotay Sideed (08) dhibcood.
Hadaba kulankii 6-aad ee tartan Cilmiyeedka bisha Ramadaan ee Warbaahinta Qaranka caawa waxaa wareegga xiga u soo gudbay tartamayaasha Degmada Hodan ee Gobolka Banaadir oo noqotay degmadii ugu horeysay ee Gobalka Banaadir ah ee wareegga 2aad u gudubta inta uu tartanka socday, ayadoo gebagebadii ay labada tartame isugu hambalyeeyeen guushaasi.
Barnaamijka sanadkan oo lagu soo kordhiyay su’aalo la weydiinayo dhageystayaasha iyo daawadayaasha ku taxan tartanka marka la gaaro qeybta dhextaalka ayaa caawa su’aashii dadweynaha la weydiiyay oo dul saarneyd 30$ ka jawaabay Shariif Sheekh Yuusuf oo jooga degmada Boondheere, kaasi oo ku guuleystay 30$ dollar oo abaalmarin ah oo ay bixineyso Bankiga IBS.
Habeen dambe haddii uu Alle idmo oo ah habeenka 7-aad ee tartanka, waxaa ku tartami doona degmooyinka Waaberi iyo Buula-burte oo ah tartameyaasha ku guuleystay tartanka sanadkii tegay, kuwaasi oo ka kala tirsan Gobollada Banaadir iyo Hiiraan.
Sawir qaade: Khadar Cali Nuur
