Tartan cilmiyeedka bisha Ramadaan oo galay sanadkii sagaalaad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho habeen waliba ayaa waxaa caawa kulankiisa sideedaad oo ah wareegga koowaad ku tartamay tartameyaasha Degmooyinka Yaaqshiid Vs Jowhar oo ka kala tirsan Gobollada Benaadir iyo Shabeelaha Dhexe, waxaana barnaamijka sanadkii todobaad oo xiriir ah taabagelineya Maamulka Gobolka Benaadir.
Tartameyaasha labada degmo ee Yaaqshiid Vs Jowhar ayaa muujiyey tartan aad u adag, isla markaana ahaa mid xiiso gaar ah xambaarsan, iyagoo soo bandhigay aqoon iyo asluub wanaag labada dhinac.
Yaaqshiid
Tartamayaasha Degmada Yaaqshiid ee gobolka Benaadir waxaa la weydiiyay todobo su’aal, waxa ay ka jawaabeen Afar su’aal, iyagoo iska qalday Saddex su’aal, waxa ay ka faa’iideysteen Hal su’aal oo soo hareer martay tartamayaasha Degmada Jowhar, sidaasi darteed wadarta guud ee dhibcaha ay heleen tartameyaasha Degmada Yaaqshiid waxay noqotay Toban (10) dhibcood.
Jowhar
Tartameyaasha Degmada Jowhar ee gobolka Shabeelaha Dhexe waxaa dhankooda la weydiiyey todobo Su’aal, waxa ay ka jawaabeen Afar su’aal, waxaana ay iska qaldeen Saddex su’aal, dhankooda waxa ay ka faa’iideysteen Labo su’aal oo soo hareer martay dhigooda Yaaqshiid, sidaa darteed wadarta guud ee dhibcaha tartameyaasha Degmada Jowhar ay heleen waxay noqotay Labo iyo toban (12) dhibcood.
Tartamayaasha Degmada Jowhar ee Gobolka Shabeelaha Dhexe ayaa caawa u soo gudbay wareegga labaad ee tartanka.
Habeen dambe haddii uu Alle idmo oo ah habeenka Sagaalaad ee tartanka, waxaa foodda is dari doono, tartamaayasha degmooyinka Dhuusamareeb Vs Deyniile oo ka kala tirsan Gobollada Galgaduud iyo Benaadir.
