Tartan cilmiyeedka bisha Ramadaan oo galay sanadkii kow iyo tobnaad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho habeen waliba ayaa waxaa caawa kulankiisa 6-aad ee wareegga 1aad ku tartamay Degmooyinka Wadajir iyo Howlwadaag oo ka wada tirsan Gobalka Banaadir, waxaana barnaamijka sanadkii 2aad oo xiriir ah taaba-gelineya Bangiga IBS.
Intii uu tartanka socday ee min afar su’aal la weydiiyay labada tartame ayaa waxaa qadka la soo geliyay Ayuub oo ah dhageyste iyo daawade, ku guuleystay saadaalin uu ka bixiyay tartanka kulankii dhexmaray Heliwaa iyo Shangaani, waxaana Axmed Cali Kaahiye oo ka mid ah Guddiga tartanka u cadeeyay Ayuub in gudiga ay siin doonaan hanaan uu abaalmarinta kaga doonan karo Bangiga IBS, maadaama qofkii saadaaliya inta uu tartanka socdo la siin doono abaalmarin, kaasi oo lagu baahiyo ka hor tartanka mareegta Warbaahinta Qaranka.
Tartameyaasha labada degmo ee Wadajir iyo Howlwadaag ayaa muujiyey tartan aad u adag, isla markaana ahaa mid xiiso gaar ah xambaarsan, iyagoo soo bandhigay aqoon iyo asluub wanaag labada dhinac inta uu tartanka socday.
Wadajir
Tartameyaasha Degmada Wadajir ee Gobolka Banaadir waxaa la weydiiyey todobo Su’aal, waxa ay ka jawaabeen Afar su’aal, waxaana ay iska qaldeen Saddex su’aal, waxa ay ka faa’iideysteen Hal su’aal oo soo hareermartay dhigooda Howlwadaag, sidaa darteed wadarta guud ee dhibcaha tartameyaasha Degmada Wadajir ay heleen waxay noqotay Toban (10) dhibcood.
Howlwadaag
Tartamayaasha Degmada Howlwadaag ee Gobolka Banaadir waxaa dhankooda la weydiiyay todobo su’aal, waxa ay ka jawaabeen Afar su’aal, iyagoo iska qalday Saddex su’aal, Waxa ay ka faa’iideysteen Hal su’aal oo soo hareer martay Howlwadaag, sidaasi darteed wadarta guud ee dhibcaha ay heleen tartameyaasha Degmada Shangaani waxay noqotay Toban (10) dhibcood.
Hadaba sida sharciga tartanka uu qabo marka ay labada degmo isku dhibco noqdaan waxaa lagu daraa su’aalo dheeraad ah, si loo kala saaro labada tartame. Waxaana su’aalihii dheeraadka ahee ee lagu daray ay tartamayaasha Degmada Howlwadaag ka jawaabeen 9 Su’aal, iyagoo iska qalday 2 su’aal, si la mid ah tartamayaasha Degmada Wadajir waxa ay dhankooda ka jawaabeen 10 su’aal, hal su’aal ayay iska qaldeen, waxaana ay heleen hal su’aal oo soo hareermartay dhigooda Howlwadaag, sidaas ayayna uga faa’iideysteen oo waxa ay ka jawaabeen 11 su’aal, wadarta guud ee ay la yimadeen howlwadaag ayaa ah 28 dhibcood, halka Wadajir ay keensadeen 32 dhibcood.
Tartamayaasha Degmada Wadajir ee Gobolka Benaadir ayaa caawa u soo gudbay wareegga labaad ee tartanka kadib markii tartan adag oo waqti dheeri a qaatay ay tartanka kaga reebeen dhigooda Howlwadaag, waxaana labada dhinac ay isugu hambalyeeyeen guusha iyo aqoonta ay ku tartameen.
Habeen dambe haddii uu Alle idmo oo ah habeenka 7-aad ee tartanka, waxaana ku tartami doona degmooyinka Boosaaso iyo Dharkeynley oo ka kala tirsan Gobollada Bari iyo Banaadir.
