Munaasabad Abaal marino lagu gudoonsiinayay tartamayaasha degmooyinka Kismaayo, Warta Nabada iyo Shibis oo ku guulaystay Tartan cilmiyeedkii Warbaahinta Qaranka ayaa maanta lagu qabtay magaalada Muqdisho.
Agaasimaha Radio Muqdisho Codka Jamhuuriyadda Soomaaliya C/fitaax Daahir Jayte oo ku hadlayay Afka Agaasimayaasha Warbaahinta Qaranka ayaa u mahadceliyay dhammaan degmooyinkii ka qaybgalay tartankii xiisaha badnaa ee la qabtay Bishii Ramadaan.
Wasiirka wasaaradda Warfaafinta Dhaqanka iyo Dalxiiska ee Xukuumadda Soomaaliya Mudane Daahir Maxamuud Geelle oo ka hadlay munaasabadda ayaa asna dhankiisa ku amaanay tartamayaasha Guulaystay dadaalka Badan oo ay ku soo bixiyeen inay Guushaan gaaraan.
Sidoo kale Wasiirka Warfaafinta ayaa u mahadceliyay dhammaan howlwadeenada Wasaaradda Warfaafinta iyo Guddigii sida gaarka ah uga shaqeeynayay Mudadii uu socday tartanka.
Ugu danbayntii Tartamayaasha Degmooyinka iyo qaar ka mid ah howlwadeenada ka shaqeeyay qabashada tartanka ayaa la guddoonsiiyay Abaal marino iyo Shahaadooyin.
