Tartan cilmiyeedka bisha Ramadaan oo galay sanadkii 9-aad oo ay qabaneyso Warbaahinta Qaranka, isla markaana si toos ah looga daawanayo Telefishinka Qaranka, lagana dhageysto Idaacadda Radio Muqdisho waxaa caawa kulankiisa Sideed iyo tobnaad ee wareegga Labaad ku tartamay Degmooyinka Wadajir iyo Shibis oo ka wada tirsan Gobolka Banaadir waxaana barnaamijka sanadkii lixaad oo xiriir ah taabagelineysa Maamulka Gobolka Benaadir.
Tartameyaasha labada degmo ee Wadajir iyo Shibis ayaa muujiyey tartan aad u adag, isla markaana ahaa mid xiiso gaar ah xambaarsan, iyagoo soo bandhigay aqoon iyo asluub wanaag labada dhinac inta uu tartanku socday.
Wadajir
Tartameyaasha Degmada Wadajir ee Gobolka Banaadir ayaa waxaa la weydiiyey todobo Su’aal, todobadii su’aal ee la weydiiyay waxa ay ka jawaabeen Hal su’aal, iyagoo iska qalday Lix su’aal, ma jirin wax ka faa’iideysi oo ay heleen, sidaa darteed wadarta guud ee dhibcaha tartameyaasha Degmada Wadajir ay heleen waxay noqotay labo (2) dhibcood.
Shibis
Tartamayaasha Degmada Shibis ee Gobolka Banaadir waxaa dhankooda la weydiiyay todobo su’aal, waxa ay ka jawaabeen Hal su’aal, iyagoo iska qalday Lix su’aal, ma jirin wax ka faa’iideysi ah oo ay dhankooda heleen, sidaasi darteed wadarta guud dhibcaha ay heleen tartameyaasha Degmada Shibis waxay noqotay labo (2) dhibcood.
Waqtigii loogu talagalay su’aalaha tartanka ayaa ku soo idlaatay bar bar dhac 2 iyo 2, waxaana lagu daray su’aalo dheeri ah, si loo kala saaro tartamayaasha labada degmo.
Tartamayaasha Wadajir oo lagu bilaabay su’aalihii dheeriga ahaa oo xisaab ah, ayaa dhankooda iska qalday, balse Tartamayaaha Shibis ma aysan ka faa’iideysan fursadaas soo martay, laakiin tartamaayasha Shibis ayaa si sax ah uga jawaabay su’aashii dhankooda ahayd, sidaas ayayna ku heleen afar dhibcood.
Hadaba kulankii 18aad ee tartan Cilmiyeedka bisha Ramadaan ee Warbaahinta Qaranka caawa waxaa wareegga Saddexaad u soo gudbay tartamayaasha Degmada Shibis ee Gobolka Banaadir, ayadoo gebagebadii ay labada tartame isugu hambalyeeyeen guushaasi.
Habeen dambe oo ah habeenka 19aad ee tartan Cilmiyeedka bisha Ramadaan ee Warbaahinta Qaranka waxaa ku tartami doona ilaa iyo afar degmo, qeybta hore waxaa lagu daah furi doonaa Degmooyinka Shangaani iyo Hodan oo ka wada tirsan Gobolka Banaadir, halka qeybta labaad ay ku loolami doonaan Degmooyinka Dhuusamareeb iyo Yaaqshiid oo ka kala tirsan Gobollada Galgaduud iyo Banaadir.
