Guddoomiye Ku-xigeenka Arrimaha Bulshada iyo Wacyigelinta Gobolka Banaadir Mudane Cabdicasiis Cismaan Maxamed oo uu wehliyo Guddoomiyaha Xariirka Kubadda Cagta Soomaaliya Mudane Cali Cabdi Shiino ayaa Garoonka Kubadda Cagta Municipio ee Degmada Warta Nabadda ka daah-furay Tartanka isdhexgalka dhallinyarada iyo La-dagaallanka Maandooriyaha, oo ay ka qeyb-galayaan 16 kooxood oo ka tirsan Warta Nabadda Academy.
Munaasabadda Furitaanka Tartankaan ayaa waxaa goobjoog ka ahaa Guddoomiyaha Degmada Warta Nabadda Marwo Seynab Maxamud Warsame Xaabsey, Agaasimaha Guud ee Arrimaha Bulshada iyo Wacyigelinta Gobolka Banaadir Mudane Cabdullaahi Aadan, qaar ka tirsan Guddoomiyeyaasha Degmooyinka Gobolka Banaadir iyo Marti sharaf kale oo ka tirsan bahda Isboortiga.
Tartankaan ayaa loogu tala-galay in ay isdhexgal ku sameeyaan da’yarta Degmada Warta Nabadda, isla markaana laga wacyigeliyo waxyaabaha maanka dooriya, si loo helo jiil maskax fiyow oo wax kusoo kordhiya bulshada iyo isboortiga Soomaaliyeed.
