Tartan xifdinta Quraanka Kariimka oo ay soo qaban qaabisay Jimciyadda Al-Ishraaq ayaa waxaa ka qeyb galay araday Soomaaliyeed oo ka kala socday 18-ka Gobol ee dalka, iyagoo ku tartami doona 114-ka Qur’aanka Kariimka, kaasi oo maanta si rasim ah uga furmay masaajidka Isbaheysiga Islaamka ee magaalada Muqdisho.
Guddoomiyaha Gobalka Banaadir ahna Duqa magaalada Muqdisho Yuusuf Xuseen Jimcaale oo furay Tartanka ayaa sheegay in uu aad ugu faraxsanyahay in Gobalka Banaadir uu martigaliyo tartankan Qur’aan akhriska ah, uuna u rajeynayo ardayda inay guul ka soo hooyaan tartanka.
Sidoo kale waxaa ka qeyb galay qaar ka mida Xildhibaanada Baarlamanka Soomaaliya iyo marti sharaf kale oo lagu casuumay.
Guddoomiyaha Jimciyadda Al-Ishraaq Maxamed Cabdiqani Siidow ayaa sheegay in uu socon doono muddo shan cisho ah, isla markaana ay ardayda ka kala keeneen 18-ka gobol ee dalka.
Qaar ka mid ah ardayda ka qeyb galaysa ayaa sheegay inay aad ugu faraxsanyihiin ka qeyb galka tartanka qur’aan akhriska.
Agaasimaha Guud ee Wasaaradda Awqaafta iyo Diinta Sheekh Cumar Faaruuq Sheekh Cabdicasiis ayaa sheegay in Wasaaraddu ay soo dhaweyneyso, isla markaana ay tani qeyb ka tahay howlaha Wasaaradda.
Guddoomiyaha gobolka Banaadir ahna duqa Muqdisho Mudane Yuusuf Xuseen Jimcaale ayaa sheegay in tartanka uu wax weyn ku soo kordhinayo carruurta baratay xifdinta Qur’aanka kariimka
Xildhibaan Maxmed Amiin Xasan oo ka mid ah guddiga Diinta iyo Awqaafta ee baarlamaanka Federaalka ah ee Soomaaliya ayaa sheegay in tani ay dareen gaar ah ku abuureyso guud ahaan shacabka Soomaaliyeed, waxaana uu ardayda ka qeyb galaysa u rajeeyay inay ku guuleystaan xifdinta Qur’aanka, isla markaana abaal marino kala duwan lagu bixin doono.
Sawir Qaade:- Qadar Cali Nuur
