Wasiir ku-xigeenka Wasaaradda Caafimaadka Cismaan Maxamed Cabdi ( Daalo ) oo ka qeyb galayey munaasabad lagu xusayey Maalinta Caalamiga ah ee Umulisadda oo sanad waliba la xuso 5ta May ayaa sheegay in Soomaaliya ay ka mid noqotay afarta dal ee ugu hooseysa ee hooyadu ay ku dhimato xilliyada uurka, dhalmada iyo Umusha, taasna ay sabab u tahay aqoon la’aanta heysata Umulisooyinka Soomaaliyeed,
Wasiir ku-xigeenku waxa uu intaas ku daray in Wasaaradda Caafimaadka oo kaashaneysa Hey’adda bad-baadinta hooyada iyo dhallaanka ee UNFPA ay Gobolada iyo degmooyinka dalka gaarsiin doonto adeeg caafimaad iyo Umuliso aqoon leh.
Munaasabadda oo lagu qabtay Dugsiga tababaradda ciidanka booliska ee Jeneraal Kaahiye waxaa goobjoog ka ahaa Marwada Madaxweynaha Dalka Marwo Sahro Cumar Xasan, Xeer ilaaliyaha Guud ee qaranka Dr. Axmed Cali Daahir, xubno ka socday Ururka haweenka ee Qaranka iyo kan Gobolka, Madax kasocotay Hey’adda Caafimaadka taageera sida UNFPA, waxa ay sheegeen dhammaan ka qeyb galayaasha in ay muhiim tahay in laga fakaro Caafimaadka hooyada iyo dhallaanka.
Guddoomiyaha Ururka Umulisooyinka Soomaaliyeed Xaliimo Cabdi Shiiq ayaa sheegtay in maalin waliba Dalka ay ku geeriyoodaan 14 dumar ah baahida umuliso aqoon leh loo qabo awgeed.
Grace, oo ka mid ah Madaxda Hey’adda UNFPA ayaa tiri: “Waa arrin aad u adag sida Maama Xaliima oo ah Gudoomiyaha ururka umulisooyinka ay sheegtay in maalin walba hooyo ay dhimato, UNFPA waxa ay idinku dhiirigelineysaa in aad xoogga saartaan in aad ka gudubtaan dhibaatadaas, waxa ay sidoo kale u mahadcelisay Garise Madaxda Wasaaradda Caafimaadka oo ay sheegtay in ay shaqo wanaagsan qabteen.
Wasaaradda Caafimaadka ayaa kusoo bandhigtay Munaasabadda Manhaj Cusub oo ay ugu talagashay in ay wax ku bartaan Umulisooyinka kaas oo dhaqan gali doona wixii hadda ka bilawda.
Ugu danbeytii Marwo Sahro Cumar Xasan Marwada Madaxweynaha Dalka oo soo xirtay Munaasaddii xuska Maalinta umulisada adduunka ayaa shahaadooyinka gudoonsiisay 23 Gabdhood oo ka baxay dugsiga lagu barto Cilmiga umulinta ee Muqdisho oo hoos yimaada Wasaaradda Caafimaadka.
Halku dhigga sanadkan ee xuska maalinta umulisadda waxa uu ahaa “ Umulisada wanaagsan waa Mustaqbalka berrito”
