Mas’uuliyiin ka socday hay’ado maxalli ah, aqoonyahanno, abwaanno Haween iyo Xildhibaan ka tirsan Baarlamaanka Soomaaliya ayaa maanta ka qeyb galay munaasabad lagu soo bandhigayay waxqabadka Ururka Haweenka Naafada Soomaaliyeed oo marka magacooda la soo gaabiyo loo yaqaan SOWDA oo muddo ku dhow labo sano ka shaqeynayay arrimaha daryeelka dadka aan lixaadoda dhameystirneyn iyo Caawinta Bulshada kale ee liita.
Intabadan Mas’uuliyiintii Munaasabaddaas ka hadlay ayaa soo jeediyay inay lama huraan tahay in la ogaado muhiimadda uu leeyahay qofka Naafada ah, isla markaana la caawiyo iyagoo si guud ugu baaqay shacabka Soomaaliyeed iyo mas’uuliyiinta sare ee Dowladda inay wax badan la qabtaan dadkaan naafada ah ee isku taagay in ay walaalahooda kale wax u qabtaan.
Aas Aasaha daladda Awood siinta Naafada Soomaaliyeed Maxamed Cali Farax ayaa sheegay in ururka uu wax u qabtay dad naafo ah iyo kuwo aanan wax haysan sida Qoysaskii ka soo cararay colaadda dalka Yemen oo ay mucaawino u qaybiyeen.
Xoghayaha daryeelka Naafada iyo barakacayaasha Ururka Haweenka Qaranka Soomaaliyeed Aamina Xasan Aadan ayaa ku dheeraatay ka hadalka muhiimadda ay bulshada iyo naafaduba u leeyihiin gabdhahaan iyo wiilashaan da’yarta ah oo iyaga oo aan caawin ku filan helin u diyaar garoobay inay wax u qabtaan bulshada kale ee ka liita.
Guddoomiyaha Machadka Horseed Cabdulle Cabdi Aadan ayaa madasha ka sheegay in Machadka uu 50 arday oo indhoolayaal ah siin doono waxbarasho heer Jaamacadeed ah, isagoo ku dhiiri geliyay ururka Naafada SOWDA in ay howshooda halkaan ka sii wadaan.
Guddoomiyaha Ururka Haweenka Naafada Soomaaliyeed ee SOWDA Basiiro Cabdi Maxamed ayaa hadal dheer kaddib ka codsatay Madaxda sare ee dowladda inay Naafada caawiyaan, lana da dajiyo sharciga xuquuqdooda siinaya naafada.
