Ururka Warbaahinta Puntland (MAP) oo ka duulaya ilaalinta badqabka suxufiyiinta ka howlgasha xarumaha Warbaahinta ee deegaannada Puntland ayaa maanta magaalada Gaalkacyo ee Gobalka Mudug ka qaybiyay agabka looga hortago faafidda cudurka COVID-19 iyo sidii qaybaha Warbaahintu ay isaga ilaalin lahayd safmaranka Dunida saamaynta wayn ku yeeshay.
Suxufiyiinta ayaa ah qaybaha bulshada ee nugul cudurkan maadaama ay si dhow ugu dhex jiraan qaybaha bulshada kuwaasi oo ku howlan soo gudbinta xogaha dalkeena ka jira.
Waxaa xusid mudan in deegaannada Puntland dhawaantan cudurka laga helay saxafigi ugu horeeyay ee uu cudurkani haleelo, taasi oo keentay in dadaal loo galo sidii loo heli lahaa badqabka suxufiyiinta.
Xarunta dhexe ee Warbaahinta Codka Nabadda Gaalkacyo ayaa ka mid ah meelaha la soo gaarsiiyay agabka looga gaashaanto xanunka safmarka ah ee COVID-19.
Cabdiqani Xayir oo ka tirsan Guddiga sare ee ururka ayaa soo gaarsiiyay qalabkan xarumaha Warbaahinta Gobolka Mudug, iyadoo baahi weyn loo qabay isticmaalka waqtiga shaqada si loo ilaaliyo caafimaadka suxufiyiinta.
Mid ka mid ah howlwadeennada Warbaahnta Cdka Nabadda Gaalkacyo ayaa yiri “Mahadsanidiin dhamaan madaxda ururka Warbaahinta Puntiland Caynsane Maxamed iyo Naciima Bintu Musa Dallaf sida mas’uuliyadda leh ad uga fikiraysaan suxufiyiinta ku shaqaysa marxaladda adag ee dalka ka jirta”.
