Wasiiru-dowlaha Wasaaradda Arrimaha gudaha iyo Federaalka ayaa maanta furay aqoon isweydaarsi ku saabsan waajibaadka aas aasiga ah ee dowladaha Hoose oo ay ka qeyb galeen Wakiilo ka kala socda maamul goboleedyada iyo xubno kale.
Wadatashiga iyo aqoon isweydaarsiga ku saabsan waajibaadka aas aasiga ah ee dowladaha hoose iyo baahida loo qabo in la helo machad lagu barto howlaha looga baahanyahay shaqaalaha ka howlgalla xafiisyada dowladaha Hoose, ayna soo qaban qaabisay Wasaaradda arrimaha gudaha iyo Federaalka ah ayaa waxaa ka qeyb galay Wakiilo ka kala socday maamul goboleedyada, Galmudug, Koonfurgalbeed, Jubbaland, xubno ka socday Maamulada Hiiraan, Banaadir iyo qaar ka mid ah Wasaaradaha dowladda, kaasi oo ah mid hal maalin.
Guddoomiye ku-xigeenka Gobolka banaadir ee dhanka arrimaha bulshada Iimaan Nuur Iikar ayaa sheegay in ay soo dhaweynayaan helidda machad lagu barto waajibaadka looga baahanyahay shaqaalaha dowladaha Hoose.
“Runtii shaqaalaha dowladda Hoose waxaa laga rabaa inay bixiyaan adeegyada aas aasiga u ah bulshada, in la helo machad arrintasi lagu barto, runtii waa arrin lagu farxo oo u baahan in ay tahay mid laga faa’iideysto” ayuu yiri Iimaan Nuur Iikar.
Xoghayaha Joogtada ee Wasaaradda Arrimaha gudaha iyo Federaalka ah ee Soomaaliya Prof Yaxye Cali Ibraahim oo ka hadlay goobta ayaa xusay in qorshahan ay ku soo beegantahay xilli loo baahnaa, isla markaana ay Wasaaraddu yeelato machad arrimahaasi wax lagu barto
“Shaqaalaha dowladaha Hoose ayaa ah kuwa laga rabo inay gaarsiiyaan bulshada adeegyo aas aasi uh, runtii waxaan ka fekernay in la helo machad Wasaaradda arrimaha gudaha hoostaga oo shaqaaalaha lagu baro waajibaadka loo idmaday” ayuu yiri Prof Yaxye.
Wasiiru-dowlaha Wasaaradda Arrimaha gudaha iyo Federaalka ah ee Xukuumadda Soomaaliya Mudane Cabdirashiid Maxamed Xidig oo furay aqoon isweydaarsiga ayaa sheegay in ujeedka ay Wasaaraddu u qabatay arrinta ay tahay in lahelo shaqaalo loo carbiyay howlaha loo idmaday.
“Waxaan isugu nimid in aan xooga saarno qorshaha ah sidii loo tayayn lahaa shaqaalaha dowaldaha hoose iyo mas’uuliyiinta, runti Federaalka waxa uu kala leeyahay, mid Federaa ah oo dowladda dhexe iyo kuwa dowladda Federaalka ah xubno ka ah, runtii barnaamijkan waxa uu qeyb ka yahay in la helo shaqaale howsha loo xilsaaray ka soo dhalaala” ayuu yiri Cabdirashiid Xidig.
Aqoon isweydaarsiga ku saabsan waajibaadka aas aasiga ah ee dowaldaha Hoose ayaa la filayaa in laga soo saaro tallooyin wax ku ool ah oo ku saabsan hirgelinta machad arrimahaasi lagu barto, si shaqaalaha dowlaha Hoose ay u noqdaan kaadiriin si hufan uga soo dhalaala howlaha loo xilsaaray.
Sawir Qaade:- Maxamed Cabdiweli Maxamed
